Пионтковский: Путин посткеңестік елдерде русофобияны күшейтті (видео)
КИЕВ. 5 ақпан. Ресейлік белгілі оппозиционер публицист Андрей Пионтковский РФ диктаторы Владимир Путиннің соғыстағы барлық әрекеттерін «ессіздік», «ақылсыздық» деп атады. Бұл туралы «Диалог.ua» хабарлады.
Андрей Пионтковский өзінің кезекті сұхбатында қазір РФ тарапынан Молдова мәнзіліне қарата жасалып жатқан қоқан-лоққының жайына тоқталды. Ол Ресей әрекеттерінің күллі бұрынғы кеңестік республикалар аумағында русофобияның кеңінен өріс алып, барынша күшейе түсуіне бірден-бір нақты себепші болып отырғандарын мәлімдеді.
Ресей сыртқы істер министрі Сергей Лавров Молдова президенті Майя Сандуды соғыс алдындағы Украина сияқты НАТО-ға кіруге ұмтылып отыр деп айыптады. УНИАН-ның журналисі Андрей Пионтковскийден мұндай қоқан-лоққының артында не жатқанын, Ресейдің келесі шапқыншылығының шылауы Молдова болатын-болмайтынын сұрады.
Пионтковский баяндаған Путиннің «соғысудағы арманының шегі» турасындағы пікірін УНИАН-ның YouTube каналындағы видеосынан естіп-тыңдауға болады.
Ресейлік оппозиционер осыған орай: «Бұл қоқан-лоққыны дәл бағалай білу үшін Путин алдымен Днестр жағалауына дейін жетіп алуы қажет, оның былтырғы ақпан, наурыз, сәуір айларында не істемек болғанына, ал қазір оның бар арманы Бахмут болып отырғанына қарау керек, түсінесіз бе? Қалай дегенде де, бұлардың ауқымдары әртүрлі. Ол қазір Днестр жағалауы емес, Бахмуттың тұрғындары қарата үндеу жариялауы керек», – деді.
Андрей Пионтковский бұдан әрі былай жалғады: «Ол өзінің ессіз амбицияларын тежеуі тиіс. Айтпақшы, сіз пропагандист Киселевтің Лавровқа қойған бұл сұрағының қандай үндестікте екеніне назар аудардыңыз ба? Ол тіпті біз бұдан әрі русофобиямен қай жерлерде күрес жүргіземіз деген мазмұнда тұтас бір сауалдар легін тоғытып тастады ғой. Олар қай елдер: Қазақстан ба, Қырғызстан ба, қайсысы, бәлки, Молдова шығар? Бұлар шетінен әлдеқандай бір жындыханада тұрып жатқан адамдарға ұқсайды. Міне, осындай оспадар ниеттерінің салдарынан олар бүкіл посткеңестік кеңістікте өздерін жеккөрінішті етіп отыр».
Бұдан алдын Пионтковский Британия мен Польшаның бұл соғыста Украина жеңіске жетуі үшін қандай «шешуші қадамға» бара алатындарына болжам жасаған еді. Бұл екі елдің де Ресейді жек көрушілігінде шек жоқ. Әлемде ондай мемлекеттер қатары барған сайын артып келеді.
