Қызылордада белгілі кәсіпкер жоғалып кетті
ҚЫЗЫЛОРДА. 17 ақпан. Қызылордада белгілі кәсіпкер Тынымбай Бәженов бұдан екі күн бұрын жоғалып кеткен. Бұл туралы Kyzylorda-news.kz хабарлайды.
Агенттікке бұл жағдайды Қызылорда қаласының тұрғыны Мөлдір Жарылғанова жеткізіп, кәсіпкер күйеуі Тынымбай Бәженовке іздеу салуға көмектесулерін сұраған.
Кәсіпкер күн сайын таңғы 05:00-06:00 аралығында Орталық стадионда спортпен айналысып, жүгіруді әдетке айналдырған көрінеді.
– Күйеуім Тынымбай Бәженов 15 ақпан күні таңғы сағат 05:00-де Орталық стадионға күндегі әдетінше жүгіруге кеткеннен оралмады. Бүгінгі таңда полицияға хабарласып, іздеу жарияладық. Барлық әлеуметтік желілерге хабарландыру бердік. Бірақ әзірге еш нәтиже жоқ. Сіздерге де ақпараттық қолдау сұрап, хабарласып отырмыз. Күйеуімді көрген-білген жандар болса, бір хабарын берулерін сұраймыз. Сүйіншісі бар, – дейді Мөлдір Жарылғанова.
Сол сияқты Серік Ерімбетов атты «Facebook» қолданушысы өзінің жазбасында кәсіпкердің жүруі мүмкін аумақта джип көлігінің бордюрге шығып кеткен ізі бар екенін айтады. Осыған орай ішкі істер органдары жұмыс жасап жатыр. Оны көлік қағып кеткен болуы мүмкін деген болжам бар. Бұдан басқа, бір көріпкел Баженовтің тірі екенін, бірақ жағдайы ауыр екенін, бір бөлмеде жатқанын жеткізген. Осыған қарағанда, қағып кеткен адам оны бір жерге апарып емдетіп жатқан немесе бір жерге тастап кеткен сияқты, деген ойын білдіреді блогер.
Осы оқиғаға байланысты кәсіпкердің отбасы ол туралы қандай да бір мәлімет білетін адамдардың төмендегі мына телефондар нөмірлеріне хабарласуларын сұрайды:
Мөлдір Жарылғанова – +7-705-982-44-45 және туыстары: +7-707-400-74-73, +7-775-779-83-19
