USD
АЛМАТЫ. 10 тамыз. Тамыздың 14-і күні Алматыдағы Орталық стадионда өтетін америкалық рэпер Канье Уэстің концерті қарсаңында мегаполистің бірнеше көшесінде көлік қозғалысына шектеу қойылады. Бұл туралы Orda.kz ақпарына сілтеме жасаған rast.kz хабарлайды.
Бұған қоса, концертті ұйымдастырушылар алаяқтардың өтірік билеттер сатуға кірісіп кеткендерін, солардан сақ болуды ескертіп жатыр.
Канье Уэст Қазақстанда алғаш рет жартылай сфералық сахнада шоу ұсынғалы тұр.
Ұйымдастырушылар мәліметінше, концерт өтетін күні сағат 16:00-ден 00:00-ге дейін Алматының үш көшесі жабық болады.
Канье Уэсттің концерті өтетін күні қаладағы үш учаске жабылады:
Абай даңғылы – Мұхтар Әуезов атындағы театрдан Сейфуллин көшесіне дейін;
Сәтбаев көшесі – Байзақовтан Сейфуллинге дейін;
Байтұрсынов көшесі – Тимирязевтен Шевченкоға дейін.
Бұл шектеулер метро жұмысына еш әсер етпейді.
Бұған дейін құқық қорғау органдары билеттерді тек ресми сервистер арқылы сатып алуға шақырады. Төлем жасалғаннан кейін сатып алушыға ваучер беріледі, ал 13 тамыз күні ол автоматты түрде бірегей QR-коды бар электронды билетке ауыстырылады.
Полицияның мәліметінше, осы күнге дейін дайын QR-коды бар билеттер болмайды. Сондықтан «қолдан», әлеуметтік желілерде немесе мессенджерлерде сатылып жатқан мұндай билеттер алаяқтардың әрекеті болуы мүмкін.
Билеттерді қайта сату да тек ресми түрде жүзеге асырылады: ескі ваучер жойылып, жаңа иесінің атына жаңа билет рәсімделеді.
Сатылым басталған кезде билеттердің бағасы 120 мыңнан 350 мың теңгеге дейін болған. Бағасының жоғары болуына қарамастан, олар тез сатылып жатыр.
Осы концертке байланысты Алматының «Қайрат» командасы Чемпиондар лигасының үшінші іріктеу кезеңіндегі матчын Түркістанда өткізгелі отыр. Клубтың баспасөз қызметі матчтың ауыстырылуына америкалық рэпер Канье Уэсттің концерті себепкерлік еткенін мәлімдеді.
Сөйтіп, «Қайрат» Орталық стадионлағы концерт пен еурокубок күнтізбесінің тығыздығына орай Қазақстан премьер-лигасындағы күнтізбелік матчтарын да өз аренасында өткізе алмайтын болды. Соңғы күндері клуб басшылығы УЕФА-ға матч өтетін орынды өзгерту туралы өтініш жасаған еді, ал Еуропа футбол қауымдастығы бұл өтінішті орындады.
