Украина Қарулы күштері «Вагнердің» Соледарды алғанын жоққа шығарды
КИЕВ. 11 қаңтар. Украина Қарулы күштері Евгений Пригожиннің «Вагнер» Соледарды басып алды деген мәдімдемесінің өтірік екенін баяндады. Бұл туралы The Moscow News хабарлады.
Әңгіме Донецк облысында көптен бері екі жақтың кескілескен шайқасы жүріп жатқан Соледар елді мекені хақында болып отыр.
«Ресейліктер оны бақылауға алдық деп жариялапты, бұлары өтірік. Оның бүге-шігесін бас штабтың мәліметтерінен күтіңіздер», – деді Украина Қарулы күштері Шығыс бағыты командованиесінің пресс-атташесі Сергий Череватый «Суспiльне Новини» эфирінде сөйлеген сөзінде.
Қаңтардың 11-не қараған түні «Вагнер» жеке әскери компаниясының басшысы Евгений Пригожин өз содырларының Соледарды өздеріне толық қаратқанын баяндаған болатын. Алайда, оның айтуына қарағанда, қаланың орталығында «кескілескен ұрыс қимылдары жүріп жатқан қазан шұңқыр» пайда болған көрінеді. Ол сонымен қатар қолға түскен «тұтқындар» санының қанша екенін «ертең айтатынын» мәлімдеген еді. Сол сияқты Соледарды басып алу тек «вагнершілердің» қатысуымен жүргізілгенін де жеткізді.
Қазір ресейліктердің Соледарды басып алмағанын Американың Соғысты зерттеу институты (ISW) да айғақтап жатыр. Оның сарапшылары «музыканттардың» сөздерінде шындық жоқ екенін айта келіп, ресейліктердің Украина Соледардан айырылса, Бахмуттың да құлайтыны жайлы болжамдарын жоққа шығарды.
Ресейдің Соледарды алуының стратегиялық емес, символдық қана мәні бар.
Мұны өзін өзі жариялаған ДХР-дың бұрынғы қорғаныс министрі Игорь Гиркин-Стрелков та айтып отыр. «Мен бүкіл Бахмут-Соледар-Северск қорғаныс шебінің құлауының өзі Украина Қарулы күштері майданының қирауына алып бармайтынын талай мәрте жазып, айтқан едім. Себебі, оның тылында Донбастың басты қорғаныс ауданы – Славянск-Краматорск шебі тұр. Оған дейін алдымен жетіп алу керек», – деп жазды ол бүгін өзінің телеграм-каналында.
Ескерту: төмендегі картадағы Артемьевск – қазір Бахмут.
