РФ генералы Украинадан соң Әзербайжанға кезек келетінін айтты
МӘСКЕУ. 21 желтоқсан. Ресей генералы, РФ армиясының ардагері Константин Сивков Украинаны бір жақты етіп алғасынғ Әзербайжан атқыланатынын әңгімеледі. Бұл туралы «Диалог.UA» хабарлады.
Ресей генералы мұны «Украина 365» атты telegram-каналға берген сұхбатында сөз еткен. Ол: «Біз Украинамен мәселені шешіп алғаннан кейін Әзербайжанмен есеп айырысатын боламыз. Әзірге Ресей Әзербайжанмен дипломатиялық канал бойынша жұмыс істей береді», – деді.
Сивков Бакудің Мәскеуге қолдау көрсеткісі келмей, Түркия мен АҚШ-ты тыңдайтынына айрықша ашулы екен.
«Ресей мұны ұмытпайды», – деп қаһарын төкті буырқанып алған әскери сарапшы.
«Украинадан соңыра біз Әзербайжанды бомбаның астына алатын боламыз», – деп ақкөздене ақиды ол бұдан әрі.
Осыдан кейін бірден генералға қоңырау шалып, өзіне айбат көрсететіндер қаптап кеткен. Олардың арасында Мәскеуде тұратын әзербайжандар аз болмаған.
«РФ ракета және артиллерия ғылымдары академиясы басшысының орынбасары Константин Сивковтан өз өміріне қауіп төнгені жөнінде шағым түсті. Қазір Ресейдің қылмыскер армиясының генералы Әзербайжанды бомбалау жөніндегі сөздері үшін өзімен есеп айырысатындар көбейгенін айтып, тісін шықырлатып отыр», – делінген хабарламада.
«Мені отбасыммен бірге құртып жіберетін болып қоқан-лоққы жасаушылар көп. Әзербайжан диаспорасы мені аңдып, аулаудың басталып кеткенін ашық айтып жатыр», – деп мұңын шақты Сивков.
Сарапшы өз еліндегі «жаудың жаулығынан» құтқарулары үшін енді ФСБ-ға шағым айтып бармақшы болып отырған көрінеді.
