USD
ДОХА. 10 желтоқсан. Катарда өтіп жатқан футболдан әлем чемпионаты кезінде Бразилия құрамасының бас жаттықтырушысы Тите қызметінен алынды. Бұл туралы rast.kz хабарлады.
Бұған пентакампеондардың 1/4 финалда жарыс жолынан шығып қалғаны нақты себеп болды. Кеше кешке Хорватия құрамасымен ұшырасқан бразилиялықтар қарсыластарына ойыннан кейінгі пенальтилерде 2:4 есебімен есе жіберіп қойды. Матчтың негізгі уақытында есеп ашылмады. Ал овер-таймда әлемнің бес дүркін чемпиондары бірінші болып есеп ашты (Неймар, 105+1). Осыдан кейін жеңіс қолдарында тұрғандай сезінген олар қорғанысқа онша мән бере қоймады. Сосын мұның жазасын қосымша тайм аяқталуға үш минут қалғанда тартты (Бруно Петкович, 117). Мұның ақыры пенальтилер сериясына алып барды.
Бұл жекпе-жекте осының алдында Жапония құрамасымен өткен 1/8 финалдық матчтан соңғы пенальтилер шайқасында да жолы болып кеткен хорваттар мергендік танытты. Сөйтіп, ойын барысында басымдық көрсете алмаған «шахмат шаршылылар» тағы сәттіліктің селебесін суырып алды.
Тите Бразилия құрамасын 2016 жылдан бері, тізгінді Дунганың қолынан алған уақыттан бастап басқарып келді. Құрама оның тұсында, 2019 жылы Америка кубогын жеңіп алды.
Осымен, Тите басқарған «селесао» екінші рет әлем біріншілігінің ширек финалынан шыға алмай қалып отыр. Мұның алдындағы мундиальда сары-жасыл түсті жейделі футболшылар ұжымы 1/4 финалда Бельгия құрамасына жол беріп қойып еді.
Бұдан кейін 10 желтоқсанға қараған түнде Нидерланд және Аргентина құрамалары жартылай финалға шығу жолында шайқасты. Матчтың 35-минутында Науэль Молина есеп ашып, аргентиналықтарды алға шығарды. Ол Лионель Мессидің берген добын голға айналдыра білді. Кездесудің екінші таймында Мессидің өзі пенальтиден гол салып (73), таблодағы есепті 2:0-ге жеткізді. Осы арқылы Аргентина құрамасы сапында әлем чемпионатында соққан голдарының саны жөнінен Габриэль Батистутамен теңесті.
Бір қызығы, кездесуде қарсыластарынан едәуір нашар ойнап жүрген нидерландтықтар негізгі уақыт біткенше есепті теңестіріп үлгерді. Осы екі голды да алаңға кейін шыққан Ваутер Вегхорст (83, 90+11) түсірді. Бұдан соңғы овер-тайм кімнің күшті екенін анықтап бере алмады. Сондықтан бұл матчтың соңында да пенальтилерге кезек берілді. Онда 4:3 есебімен басым түскен аргентиналықтардың бағы жанды.
Осылайша жартылай финалдық кездесудің бірінші жұбы анықталды. Ол 14 желтоқсанға қараған түні сағат 01:00-де Хорватия – Аргентина құрамалары арасында өтеді.
Бүгін сағат 21:00-де Марокко – Португалия, ал 01:00-де Франция – Англия арасында 1/4 финалдың соңғы жұптары арасында матчтар ойналады. Осы текетірестерде жеңіске жеткен құрамалар жартылай финалдық екінші жұпты құрайды.
