Моңғолияда наразылар тобы Үкімет сарайына шабуылдады
УЛАН-БАТОР. 5 желтоқсан. Моңғолия байтағында $12 млрд тұратын көмірдің ұрлануына наразылық білдіргендер Үкімет сарайын басып алуға әрекет жасап жатыр. Бұл туралы Central Asia хабарлады.
Оқиға былай басталған. Кеше, 4 желтоқсан күні елде $12 млрд тұратын экспорттық көмірдің қолды болғанын естіген жұрт жаппай наразылық қозғалысына шыққан.
Baza телеграм-каналының жазуынша, бүгін олар биліктен көмірді талан-таражға салушыларды жазалауды талап етіп, ел байтағындағы Үкімет сарайын басып алуға әрекет жасап баққан.
Мұның алдында жергілікті бұқаралық ақпарат құралдары Қытайдан алынған көмір мөлшерінің елге әкелінген көлемнен едәуір айырмашылығы бар екенін жазған еді. Былайша айтқанда, моңғол жеріне жеткізілген көмір ауқымы белгіленгеннен едәуір аз болған. Осының қорытындысында Қытай тарапы өз елінде шикізатты ұрлауға қатысы барлардың бәрін өлім жазасына кескен. Жөңге басшылығы мұнымен де тоқталмай, бұл ұрлыққа Моңғолия жағынан араластықтары бар саясаткерлердің аты-жөндерін премьер-министр Оюун-Эрдэне Лувсаннамсрайға арнайы хабарлаған.
Енді наразылық акциясына көтерілген шерушілер үкімет пен президенттен ұрылардың аты-жөндерін толық атап, олардың жемқорлық сызбаларын ашып көрсетуді талап етуде.
Baza-ның мәліметі бойынша, күштік құрылымдар сарайға шабуылға шыққандардың алғашқы әрекетін қайтарып үлгерген, алайда, ашулы жұрт ғимаратты басып алу ниетінен әлі қайтатын емес.
