Қырымдағы авиабазада орын алған жарылыс жұрт үрейін ұшырды

СИМФЕРОПОЛЬ. 9 тамыз. Қырымның Новофедоровка елді мекеніндегі әскери аэродромда сейсенбі күні орын алған жарылыстар мұндағы елдің үрейін ұшырды. Бұл туралы The Moskow Times хабарлады.

Әскери аэродромда күндіз бірнеше рет қайталанған жарылыстар сериясынан кейін Қырымға демалуға келген туристер арасында сапырылыс туғызды.

Ресей қорғаныс министрлігі авиабаза «отты әрекеттер» болмағанын айтып сендіруге тырысса да жұрттың қорқынышы сейілмеді. Ал Қырымның басшысы тұрғындардың қауіпсіздігін қамтамасыз етудің «барлық шараларын» қабылдауға уәде беріп жатты.

Бірақ «пәлелі жерден» жедел қашып бара жатқан жұртта есеп болмады.

Қырым көпірінде демде кептеліс пайда бола қалды. Көліктер нөпірі өткелге көп жетпей жатып-ақ басталды.

Қырымда жарылыстар болғаны жайлы жаңалықтар түбектің жағалауына тез арада тарап кетті.

«Делфин» туристік операторының бас директоры Сергей Ромашкин «Интерфакстің» тілшісіне аэродромның жағалаудан қашық екенін айтты.

«Жеке секторда орналасатын туристер де бар, бірақ жарылыс олардан да қашық жерде орын алды», – деді ол.

Қырым медицина министрлігінің мәліметінше, жарылыс салдарынан бес адам зардап шеккен. Ал Аксенов бір адамның қаза тапқанын жеткізді.

Моральдық тұрғыдан алғанда, Қырымда жарылыстың орын алуы президент Владимир Путин үшін өте ауыр қабылданатын жағдай, дейді саясаттанушы Федор Крашенинников. «Ол Қырымды украиндардың қауіп-қатерінен қорғалған сенімді және алыс тыл деп есептеуші еді. Көріп тұрғанымыздай, онда адамдар демалып жүр екен, демек бұған дейін ешқандай қауіпті сезінбеген. Енді туритстер бұл жерде қалмайды, мына оқиға бүкіл Ресейді шарлайды, шын мәнінде Қырым майданмен шектес аудан ғой», – деді ол.

Украина Қорғаныс министрлігі өздерінің бұл жарылысқа қатысы жоқ екенін мәлімдеді. Ресей тарапы оның қауіпсіздікті сақтамау салдарынан орын алғанын баяндады.