Тоқаев Ресей ғана емес, Қырғызстан орденінен де бас тартқан
АСТАНА. 18 маусым. Қазақстан Президенті Қасым-Жомарт Тоқаев Санкт-Петербургте өткен экономикалық форумнан соң Ресейдің Александр Невский орденін алудан бас тартты. Бұл туралы rast.kz хабарлады.
Қазір бірқатар отандық бұқаралық ақпарат құралдары ғана емес, әлеуметтік желілерде Тоқаевтың РФ орденін алудан бас тартқаны жазылып, қызу талқыланып жатыр. Алайда, бұл оның тарапынан жасалып жатқан мұндай бірінші байлам емес.
Мұның алдында Мемлекет басшысы Қырғызстанға ресми сапармен барғанында да сол елдің Манас орденін алудан бас тартқан болатын. Ол мұндай марапаттардың керегі жоқ екенін айтты. Ол жайында қырғыздың K-News.kg сайты жазды. Мұны Қазақстан Президентінің баспасөз хатшысы Руслан Желдібай растады.
Бұл жолы Нева жағалауындағы қалада Ресей тарапы Қасым-Жомарт Тоқаевты Александр Невский орденімен марапаттау туралы ұсыныс жасаған. Бірақ Қазақстан Президенті бұған үзілді-кесілді қарсылық білдірген.
«Бұған дейін Қасым-Жомарт Тоқаев өзінің президенттік өкілдігі аяқталғанға дейін отандық та, шетелдік те ешқандай марапатты қабылдап алмауға шешім қабылдаған еді», – деп жазды қырғыз сайты.
