USD
ЖЕНЕВА. 23 мамыр. Ресейдің БҰҰ жанындағы тұрақты өкілдігінің қызметкері Борис Бондарев өз елінің Украинадағы соғысына наразылық ретінде отставкаға кетті. Бұл туралы «Медиазона» хабарлады.
Дипломат Путиннің бастаған соғысын тек украин халқына ғана емес, сонымен қатар Ресей халықтарына да қарсы жасалған зор қылмыс деп есептейді.
Ресейдің Женевадағы БҰҰ бөлімшесі жанындағы тұрақты өкілдігінің қызметкері Борис Бондарев Украинадағы соғысқа байланысты өзінің отставкаға кететінін мәлімдеді. Оның айтуынша, бұған дейінгі дипломатиялық қызметі уақытында оған бірде-бір рет дәл қазіргідей өз елі мен жұмысы үшін ұялуға тура келмеген.
«Путин бастаған Украинаға, ал іс жүзінде бүкіл батыс әлеміне агрессиялық соғыс – тек украин халқына ғана емес, сонымен қатар, айтары жоқ, Ресей халқына да қарсы жасалып отырған ең ауыр қылмыс», – деп жазды ол өзінің LinkedIn әлеуметтік желісіндегі парақшасында.
БҰҰ-ның Женевадағы бөлімшесінің сайтындағы мәліметтерге сәйкес, Бондарев тұрақты өкілдікте кеңесші лауазымын атқарған. Оның сөзіне қарағанда, дипломатиялық жұмыста 20 жылдан бері қызмет етіп келеді. «Өкінішке орай, осы 20 жыл бойына Сыртқы істер министрлігінде өтірік пен кәсіби біліксіздіктің деңгейі барлық уақытта тоқтаусыз өсумен болды», – деп ақтарылды дипломат.
Бондаревтің сөзінше, Ресей сыртқы істер министрлігі дипломатиядан гөрі «жалғандықтың ұрығын сеуіп, соғыс отын тұтандырып отырумен» көбірек айналысқан. «Ресейде сондықтан қазір бірде-бір шынайы одақтас ел қалған жоқ», – деп жазды ол РФ-ның агрессиялық саясатының залалын түсіндіре отырып.
«Мұндай соғысты бір ғана мақсатты – билік басында мәңгі қалуды, талғамсыз соғылған сарайларда шалқып өмір сүре беруді, тоннажы мен бағасы жағынан Ресейдің бүкіл Әскери-Теңіз флотымен теңесе алатын яхталарда жүзуді көздеген адам ғана ойлап табады. Осы үшін олар мыңдаған адамның өмірлерін қиып жіберуге дайын. Осы мақсат үшін қазірдің өзінде мыңдаған ресейліктер мен украиналықтар қаза тауып үлгерді», – деді ол.
Айтуынша, өзі бұған дейін мансабын өсіруді қалаған екен, бірақ қазір өзі үшін мемлекеттік қызметте қала беру Отанды сатумен бірдей нәрсе болып саналатындықтан, бұдан бас тартуына тура келеді.
Бондарев, бәлки, Ресейдің Украинадағы соғысқа байланысты отставкаға кетуге ұйғарым жасаған бірінші кадрлық дипломаты шығар.
Министрлік әзірге бұған байланысты түсіндірме берген жоқ.
