Жан Ахмадиев Алтынбек Сәрсенбаевты кімнің өлтірткенін айтты
АЛМАТЫ. 23 мамыр. Қазақстандық рэпер Жан Ахмадиев қоғам қайраткері Алтынбек Сәрсенбаевты өлтіруге тапсырма берген Дариға Назарбаева екенін мәлімдеді. Бұл туралы Orda.kz хабарлады.
Оның сөзіне қарағанда, Дариғаның тапсырма бергенін айғақтайтын бірнеше нақты факті бар.
«2004 жылы бұрынғы Ақпарат министрі, оппозиционер Алтынбек Сәрсенбаев ағамыз «бірқатар бұқаралық ақпарат құралдарын басып алып, мемлекеттік қазынадан мақсатсыз қаржы алып жатыр» деп айыптап, Дариға Назарбаеваны сотқа берген болатын. Осы процестен кейін көп ұзамай, 2006 жылы Алтынбек ағамызды бәзбіреулер қаланың сыртына апарып, атып тастады» дейді Жан Ахмадиев.
Ол Виктор Храпуновтың сұхбатына сілтеме жасап, тағы мынадай мысал келтірді:
«Парламенттегі отырыстардың бірінде Алтынбек Сәрсенбаев Дариға Назарбаеваға қарап: «Мен сенің телеарналарды қалай жекешелендіріп алғаныңды жақсы білемін. Қолымда дәлелім бар. Жақында бұл құжаттарды елге жария қылмақпын. Сонда маған не істей аласың?»– деді. Сол кезде Дариға орнынан атып тұрып: «Ей, Алтынбек, көп ұзамай сені өлтіретін адам табылып қалар!» – дегені әлі есімде.
Аузымыз ашылып қалған еді сонда,
Сондай-ақ Дариға Назарбаевамен етене араласқан Адонис Дербас деген канадалық кәсіпкер дастархан басында Дариға, Рахат Әлиев және басқа да бірнеше адам әңгіме-дүкен құрып отырғанда, Әлиевтің: «Алтынбек Сәрсенбаевты өлтіру керек!» деген сөзін Адонис Дербас өз құлағымен естіген».
Жан Ахмадиев осының бәрі бұлтартпас дәлел екенін алға тартып отыр.
