Харьков түбіндегі Ольховка селосында екі-ақ адам тірі қалған
КИЕВ. 16 мамыр. Ресей басқыншылары кеткеннен кейін Харьков түбіндегі Ольховка селосында екі-ақ адамның тірі қалғаны белгілі болды. Бұл туралы «Белсат» хабарлады.
Наталья Юрьевна (суретте) – Ресей оккупациясынан кейін Ольховкада тірі қалған екі адамның бірі. Ол қазір осы маңдағы бар мысықты тамақтандырып жүр екен. Ал өз үйінде газды пеш істемейді, басқыншылар қиратып кеткен. Сондықтан даладан ағаш теріп әкеп, жағып отыр.
Харьков облысының солтүстігінде кескілескен шайқас әлі жүріп жатыр. Украин армиясы біртіндеп жауды ығыстырып, мемлекеттік шекараға қарай жақындатып келеді. Осындай жаудан босаған селолардың бірінде «Вот Так» тілшісі Алексей Барановский болып қайтты. Ольховка бұдан бір ай бұрын жаудың қол астында болып еді. Оны украин әскерлері сәуірдің басында басқыншылардан босатты. Алайда, арада бір ай өткенімен, село сол кездегідей қаңыраған күйінде тұр.
Ольховкадан шыға берістегі автожолдың бойында Ресейдің қирап қалған екі бронетранспортері көрінеді. Олардың біріндегі Z деген свастикалық белгілі украин әскерлері өздерінше үстінен өзгертіп қойыпты. Енді ол «Zov Kobzona» болып оқылады.
Қираған машиналардың арғы жағынан бірден Бейбітшілік (Мир) көшесі басталып кетеді. Көшенің екі бетіндегі үйлерлерде де сау-тамтық жоқ. Шашылған тастардан, шыны сынықтарынан, иілген темірлерден, ағаш қиындыларынан аяқ басып жүру мүмкін емес.
«Мир көшесіне «Руский мир» келді», – деген ойға батады сонда тілші Барановский қаңырап жатқан селоны аралай жүріп.
Ол үйлердің бірінің ауласынан селода тірі қалған екінші адам – қабағы түсіңкі Виктор деген ағайды кезіктіреді. Оның жанында үш шетелдік журналист тұр екен. Бұдан әрі чех журналисі Ленчамен бірге елді мекенді аралап, оның әбден қиратылғанына көз жеткізеді.
«Міне, саған «Орыс әлемі», ол өзінің қандай екенін Украинаның барлық ендіктері мен бойлықтарында толық ккөрсетіп болды», – дейді ол.
