Қызылордадан келген қыз Павлодарда балаларға би үйретуде

ПАВЛОДАР. 12 сәуір. Павлодар облысының Успен аудандық мәдениет үйінде Қызылорда облысынан келген хореограф қыз балаларға би үйретіп жатыр. Бұл туралы Pavlodarnews.kz хабарлады.

Аудан орталығында би үйірмесін ашқан Толқынай Абдуллаева Қызылорда облысының Жаңақорған ауданынан келген болып шықты. Ол қазір Успен аудандық мәдениет үйінде хореограф болып жұмыс істейді.

Айтуынша, бала кезінен бимен айналысқан. Кейін бұл құштарлығы кәсіптік мамандығына айналған.

«Қазіргі таңда 55 баланы биге үйретудемін. Болашақта жеке би мектебін ашсам деп армандаймын. Мен бұл жоба бірегей болатынына сенемін, өйткені, қосымша ерекше балалармен жұмыс істейтін боламын. Алғашқы мамандығым бойынша медицина саласында жұмыс істей жүріп, осындай балалармен тығыз байланыста болдым», – дейді Толқынай Абдуллаева.

Хореограф бұл жаттығулар мен би қимылдарының иммунитетті жақсартуға және денсаулықты нығайтуға көмектесетінін айтады. Сонымен қатар, би сабақтары  көңіл-күйді көтереді. Қазір ол би үйірмесін ашу жөніндегі бизнес-жоспарын жүзеге асыру үстінде.

Жақында успендік биші балалар Астана қаласында өткен халықаралық конкурста жеңімпаз атанған. Ал Павлодарда өткен халықаралық байқауларда бірінші және екінші орындарға ие болған. Аудандық байқауда гран-при және екінші орынды жеңіп алды.

Балалар үйірмеде халық, эстрадалық, заманауи және шығыс билерін үйреніп жүр.