Алик Айдарбаев «ҚазМұнайГаздың» басшысы қызметінен кетті
АСТАНА. 11 сәуір. Алик Айдарбаев «ҚазМұнайГаз» акционерлік қоғамындағы басшылық қызметінен біржола кетті. Бұл туралы «Айқын» хабарлады.
Басылым мұны «Самұрық-Қазына» қоры қоғаммен байланыс және өзгерістерді басқару жөніндегі басқарушы директоры Ғибрат Ауғановтың мәлімдемесіне сілтеме жасап баяндады.
«Алик Серікұлы Айдарбаев денсаулығының нашарлауына байланысты өз еркімен жұмыстан босату туралы арыз берді. Осыған байланысты мәселе алқада, сондай-ақ уәкілетті органдарда қаралып, шешім қабылданды», – деп түсіндірді Ауғанов қордың онлайн брифингінде.
Бұған дейін Алик Айдарбаевтың «ҚазМұнайГаз» төрағасы ретіндегі өкілеті мерзімінен бұрын тоқтатылғаны хабарланған болатын. Оның орнына Құрманғазы Есқазиев «ҚазМұнайГаз» АҚ басқарма төрағасының міндетін атқарушы болып тағайындалды.
