USD
КИЕВ. 20 наурыз. Ресей армиясы құрамында Украинадағы соғысқа қатысып, жүздеген сарбазын оққа ұшырып алған «қадыровшылар» Грозныйға қайтып оралды. Бұл туралы «Азаттық» радиосы хабарлады.
«Кадыровшылар» атанып отырғандар – Шешенстанның ұлттық гвардиясы.
«Ресей Украинаға басып кірген алғашқы күндерден соғысқа шешен әскери қызметкерлері қатысып жатқаны жайлы айтылды. 26 ақпанда желіде Шешенстаннан болулары ықтимал әскери қызметкерлердің Гостемельдегі әскери бөлім ғимаратына Ресей туын тігіп жатқаны бейнеленетін видео тарады», – делінген хабарламада.
Ал 27 ақпанда Украинаға кірген Ресей гвардиясының Шешенстандағы 141-ші моторлы полкының командирі, генерал-майор Магомед Тушаевтың қаза тапқаны белгілі болды. Мұны осы бөлімшенің тұтқынға түскен сарбазы растап берді. Дерек бойынша, 26-28 ақпан күндері оққа ұшқан Кадыров жауынгерлерінің жалпы саны бірнеше жүзге жетеді.
4 наурызда Чернобыль аймағына Шешенстан ұлттық гвардиясының 1200-ге жуық жаңа жасағы келді. Оның құрамына «Север», «Юг» әскери батальондары мен «Ахмат-Грозный» ОМОН-ы кірді. Олар өз құрылымы лагерін Бордянка түбіндегі орманға құрды. Украин ұлттық қауіпсіздік қызметінің мәліметінше, осыдан кейін көп ұзамай лагерьде түнде оқ-дәрілер жарылып, жауынгерлердің бір бөлігі қырылып қалған.
Украина Жоғарғы радасының адам құқықтары жөніндегі уәкілі Людмила Денисованың айтуынша, «кадыровшылар» Бордянкадағы сол мезетте 600 адамы бар психоневралогиялық интернатты басып алған.
Украина ұлттық қауіпсіздік қызметі барлаушыларының мәліметінше, «кадыровшылар» 13 наурызда Киев облысының территориясынан Беларусь арқылы әкетіліп, одан әрі әуе кемесімен өз елдеріне жеткізілген. Әскери бірлестік жеке құрамының аз күннің ішінде үлкен шығындарға ұшырауы мен тиімділігінің өте төмен болуы оның Ресей командованиесінің үмітін ақтай қоймағанын айғақтайды.
«Кадыровшылар» Грозныйға оралғаннан кейін жертөле баспанада аймақ басшысы Рамзан Кадыровтың қатысуымен кеңес өткен көрінеді.
Журналистер зерттеу барысында тағы мыналарды анықтады:
* Рамзан Кадыров Киевтің түбінде жүргені жөнінде қауесет таратқан кезде өзі шын мәнінде Грозныйда отырған;
* Рамзан Кадыровты өлтіретін адамға 100 мың доллар көлемінде сыйақы мен Киев түбіндегі үй белгіленді;
* Энергодарда «кадыровшылар» Запорожье АЭС-ін атқылап, станцияның қарусыз бірнеше қызметкерін атып өлтіріді;
* «Кадыровшылардың» Украина жеріндегі тағы бір міндеттері президент Зеленскийді өлтіру болды. Бірақ «элиталы жасақ» Киевтің маңайына бара алмай, өздері көп шығынға ұшырап кері қайтты.
* 1 наурыз күні Украина әскерилері «кадыровшылардың» бірінші толқынмен келген тобын жойып жіберді.
