Украин әскерлері басқыншыларды қолдан келгенінше жоюға кірісті

КИЕВ. 26 ақпан. Украина армиясы жаудың жасақтарын жоюды жалғастырып келеді. Бұл туралы УНИАН хабарлады.

Өткен түнде Ресей басқыншылары Украина астанасын басты нысанаға алып, бар күшін осында төкті. Алайда, олар мақсаттарына жете алмады. Украин солдаттары дұшпанның барлық шабуылдарын сәтті қайтарып, оның адам және техника күштерін ұдайы жоюмен болды.

Украина жаяу әскерлер армиясының штабы хабарлағандай, украин сарбаздары Киевтегі метроның Берестей станциясы маңында ресейлік әскерлердің тұтас колоннасын жойып жіберген.

«Киевтегі «Берестей» метросында 101-ші бригада жаудың 2 жеңіл машинадан, 2 жүк көлігінен, бірнеше бронетехника мен танктерден құралған колоннасын жойып жіберді. Қазір ондағы ахуал тыныш, бәрі жер жастандырылды», – делінген хабарламада.

Бұл ауданда түні бойы ұрыс жүрген.

Ресей әскерлері 26 ақпан күні түнгі сағат 3 шамасында Сумы облысындағы Копти – Бачевск трассасын басып алды. Хабарланғандай, оккупанттар енді ол жерден жергілікті тұрғындардың өтуіне де мүмкіндік бермей жатыр.

Қазір облыста автобус қатынасы да, теміржол қатынасы да тоқтаған.

Ресейліктер Васильково түбіне десант түсірді. Олармен шайқаста Украина қарулы күштерінен де шығындар болды.

Васильково қаласының мэрі Наталья Баласиновичтің айтуынша, қазір қалада ұрыс жүріп жатыр. Елді мекенді басқыншылар ракетамен атқылаған. Осында украин жауынгерлері ресейліктердің десантшыларды алып келе жатқан бір ұшағын атып түсірді.

Қала басшысы Васильковоның орталық көшелерінде екі жақ әскерлері атысып жатқанын айтты. Мұнда өте көп мөлшерде десантшылар түсіріліпті. Олар украинның 40-шы бригадасы сарбаздарымен соғысуда. «Өкінішке орай, бізден де біраз шығын бар. Жараланғандар да жетерлік», – деді мэр.

Одесса маңындағы Черноморск қаласы іргесінде жауынгерлер жайдың дронының қанатын қырқып түсірді.

Чернигов маңындағы ұрыстарда да украин солдаттары дұшпанды едәуір шығынға ұшыратты.

Бүгін соғыстың үшінші күні өтіп жатыр.