«РОП операторы» басшысы қашып бара жатқанында қолға түсті
АСТАНА. 26 қаңтар. Елордада «РОП операторы» ЖШС-ның басқарма төрағасы Медет Құрманғалиев шетелге ұшып кетпекші болып тұрған жерінен ұсталып, қамауға алынды. Бұл туралы «Айқын» хабарлады.
Қазақстан қоғамында утилизациялық алымға қатысты наразылық соңғы жылдары қатты күшейіп кеткен еді. Биылғы қаңтардың 2-сінде бейбіт шеруге шыққан Маңғыстаудағы Жаңаөзен қаласы тұрғындарының дәсәуілге талаптары аяқ астынан күрт көтеріліп кеткен газ бағасын 50 теңгеге дейін түсіру болса, екінші және үшінші талаптары «Шал, кет!» деген саяси ұран мен осы утилизациялық алымды (мүлікті пайдалану салығы) алып тастау секілді тұрмыстық мәселелеерге ұласқан болатын.
Бір ғажабы, сол алымды сыпырыип-сиырып алып отырған «РОП операторы» деген жалмауыз құрылым Назарбаевтың кіші қызы Әлияның жеке меншігіндегі мекеме болып шықты.
Ал халықтың ашу-ызаға толы қатаң талабының орынды екенін пайымдамаған Президент Қасым-Жомарт Тоқаев сол бойда бұл проблеманың өзегіне өңіліп, «РОП операторына» қатысты тексеру жұмыстарын жүргізуге пәрмен берді. Артынан ол Үкіметтің қаулысымен өз жұмысын тоқтатты.
Міне, осы компанияның басшысы Медет Құрманғалиев өзіне шындап тықыр таянғанын сезсе керек, бөгде елге кетіп, бой тасалай тұрмаққа бекініпті. Бірақ бір өзі емес, қасында сыбайласы – Экология, геология және табиғи ресурстар министрінің орынбасары Ахметжан Пірімқұлов бар. Сыбайлас жемқорлыққа қарсы іс-қимыл агенттінің қызметкерлері сол жерде олардың екеуінің де қолына кісен салды.
«Олар сыбайлас жемқорлық қылмыс жасады деген күдікке ілінді. Екеуі де Нұр-Сұлтан қаласының уақытша ұстау оқшаулағышына қамалды» делінген агенттіктің ресми хабарламасында.
Бұдан былай үш министрлік бірлесіп, утилизациялық алым мәселесін шешеді.
PS. Осымен бір мезгілде «РОП операторы» ЖШС-ның қаржы жөніндегі директоры Руслан Шәмшиевтің қайтыс болғаны туралы қаралы хабар тарап жатыр. Оның қандай жағдайда және нендей себептен қайтыс болғаны әзірге белгісіз. Бұл оқиғаның алдыңғы екеудің ұсталуына қаншалықты қатысы бары да белгісіз. Тек оның 1978 жылы Қызылорда облысында туғаны ғана мәлім.
