Алпыс жастағы ақсақал төрт әйелінің бірін пышақтап өлтірді

ТАШКЕНТ. 19 шілде. Өзбекстанда 60 жастағы ер кісі өзінің азаматтық некедегі төртінші әйелін пышақтап өлтіріп тастады. Бұл туралы CentralAsia.uz хабарлады.

Қанды оқиға марқұм әйел жұмыс істейтін медициналық мекеменің тап өзінде орын алды. Ол осында дәрігер болып қызмет істейді екен.

Хабарланғандай, қаза тапқан әйел өзін өлтірген еркектің төртінші жұбайы екен. Олар 7 жылдан бері бірге тұрып келіпті.

Оқиға 10 шілде күні болған. Бірақ оның дерегі бүгін ғана белгілі болып отыр.

Марқұм әйелдің әріптестерінің айтуларына қарағанда, ол күйеуінің үнемі арақ ішіп жүретінін, соның салдарынан ылғи ұрыс шығарып отыратынын айтып, шағынып келіпті.

Оқиға бойынша қылмыстық іс қозғалды. Тергеу жүріп жатыр.