USD
МАДРИД. 7 мамыр. Мадридтің «Реал» футбол клубы 30 жастағы футболшы Эден Азарды осы жазда өтетін маусым аралық трансферге қойды. Бұл туралы Twitter-де хабарлама жарияланды.
«Корольдік клубты» көптен бері негізгі құрамда ойнай алмай жүрген бельгиялық футболшыны биылғы жазда сатуға шығаратын болды. Оның үстіне, Эдердің «Челсимен» күні кеше Англияда өткен Чемпиондар лигасының жартылай финалдық қарымта матчында өзін жақсы жағынан көрсете алмағаны да бұған себеп болған сияқты. Расында сол кездесуде баяғы Эдердің көлеңкесі ғана жүрді.
Матч 2:0 есебімен лондондықтардың пайдасына шешілді. Мұның алдында өз алаңында да жеңілген (1:2) «Реал» турнирден «ұшып» кетті. Кездесуден кейін Азар өзінің бұрынғы командадалас әріптестерімен көтеріңкі көңіл күймен қауышып, емен-жарқын сөйлесті. Ал «сарымайлықтардың» фанаттарын бұл кадрлар қатты жындандырды. Олар осыған байланысты Эденге ауыздарына келгендерін айтып, қаралап бақты.
Эден Азар «Реалға» 2019 жылғы жазда 115 млн еуроға сатылып келген еді. Бұған дейін ол жеті жыл Лондонның «Челси» командасының намысын қорғаған болатын. Ал мансабының басын француздың «Лилль» командасында бастап еді. Биылғы маусымда форвард испан чемпионатының 11 ойынына қатысып, 2 гол соқты және бір нәтижелі пас берді. Бірақ осымен оның Примерадағы, яғни Ла-лигадағы мансабы аяқталатын сияқты.
