USD
ҚЫЗЫЛОРДА. 12 мамыр. Бүгін Қызылордада «Turgyndar amanaty» партиялық жобасы аясында форум болып өтті. Бұл туралы Қызылорда облысы әкімі баспасөз қызметінің дерегіне сүйенген rast.kz хабарлайды.
Оған Қызылорда облысының әкімі Мұрат Ергешбаев, «Аманат» партиясының хатшысы Ержан Жылқыбаев, Парламент Мәжілісінің депутаты Мархабат Жайымбетов, сондай-ақ Өнеркәсіп және құрылыс министрлігінің мамандары қатысты.
Форумда көп пәтерлі тұрғын үйлерді басқару жүйесін жетілдіру, тұрғын үй-коммуналдық шаруашылық саласындағы өзекті мәселелер талқыланды.
Аймақ басшысы көтеріліп отырған мәселеге орай өз ойларын ортаға салды.
«Мемлекет басшысының тапсырмасына сәйкес, Қызылорда қаласының көп қабатты тұрғын үйлерін ыстық сумен қамту жобасы жүзеге асырылып, бүгінде тұрғындар оның игілігін көруде.Тұрғын үй қорын жаңарту тұрақты бақылауымызда тұр. Үш жылда 3 млрд 500 млн теңгеге 65 көп пәтерлі тұрғын үй күрделі жөндеуден өтті. Қызылорда қаласында 1 млрд 775 млн теңгеге 60 ескі көп қабатты тұрғын үйдің қасбеттері заманауи панельмен қапталды, 4 млрд теңгеге қосымша 70 тұрғын үй жаңартылып жатыр. Аулаларға демеушілер есебінен 80 спорт, ойын алаңы орнатылды», – деді Мұрат Нәлқожаұлы.
Ол «Таза Қазақстан» экологиялық акциясы аясында елді мекендерді абаттандыру, қоршаған ортаны таза ұстау, көгалдандыру және экологиялық мәдениетті қалыптастыруда ауқымды шаралар ұйымдастырылып келе жатқанын әңгімеледі. Мақсат тұрғындардың жайлы өмір сүруіне қолайлы жағдай жасау болып отыр.
«Форум аясында көтерілген бастамалар еліміздегі және Сыр өңіріндегі тұрғын үй саласының дамуына оң серпін береді деп сенемін. Баршаңызға мықты денсаулық, отбасыларыңызға амандық, еңбектеріңізге табыс тілеймін!», – деді Мұрат Ергешбаев өзінің сөзінде.
Басқосуда «Аманат» партиясының хатшысы Ержан Жылқыбаев, Парламент Мәжілісінің депутаты Мархабат Жайымбетов, Өнеркәсіп және құрылыс министрлігі құрылыс және тұрғын үй-коммуналдық шаруашылық істері комитеті төрағасының орынбасары Қанат Мыңбаев, «Қазақстан тұрғын үй-коммуналдық шаруашылықты жаңғырту мен дамыту орталығы» АҚ департаментінің директоры Марғұлан Жеңісұлы, облыстық энергетика және тұрғын үй-коммуналдық шаруашылық басқармасының басшысы Медет Усаин, Қызылорда қаласының әкімі Нұржан Аханов, Қызылорда қалалық пәтер иелері ассоциациясының төрағасы Ілімжаухар Кеңесқызы сөз сөйледі.
