USD
АСТАНА. 30 сәуір. Төтенше жағдайлар министрі Шыңғыс Әрінов Жайық жағасындағы аудандарда 84 елді мекенді су тасқынының құрсауынан құтқарып қалғандарын жеткізді. Бұл туралы inbusiness.kz ақпарына сүйенген rast.kz хабарлайды.
Ведомство басшысы мұны бүгін тікелей эфирде жүргізілген «Біз біргеміз» жалпыұлттық телекөпірінде мәлімдеді. Ол Жайық бойындағы жағдай туралы мәлімет ұсына отырып, осы аумақта жүргізілген барлық оңды жұмыстар үшін барша қазақстандықтарға алғыс сезімін жеткізді.
«Қазіргі таңда Жайықтың қатерлі толқыны Батыс Қазақстан өңірінен өтіп, Атырау облысына бет алды. Бірақ Жайық бойындағы 84 елді мекенді аман алып қалдық деп айтсақ болады. Оған дер кезінде атқарылған дайындық жұмыстары себепкерлік етті. Өздеріңіз көрдіңіздер, қаншама шақырым бөгет салынды. Бүкіл ел болып, барлық өңірден арнайы техника, күш құрылымдары келіп жатыр. Соның арқасында бәрі уақытында істеліп, Жайық деңгейі көтерілгеніне қарамастан, 84 елді мекенге ешқандай қауіп болған жоқ», – деді министр.
Шыңғыс Әрінов осы жұмыстарға атсалысқан барша қазақстандықтарға алғыс айтты.
«Осы сәтті пайдаланып, өзіміздің құтқарушыларға, Қарулы Күштердің, Ішкі істер министрлігінің, Ұлттық қауіпсіздік комитетінің, Мемлекеттік күзет қызметінің өкілдеріне, барлық күштік құрылымдардың сарбаздарына ризашылығымды білдіремін. Сондай-ақ, тасымалдауға атсалысқан ҚТЖ ұлттық компаниясының өкілдеріне, тасқынмен күреске атсалысқан адамдардың бәріне рахмет айтқым келеді», – деді Шыңғыс Сайранұлы тікелей эфир кезінде.
