USD
ШЫМКЕНТ. 2 мамыр. Шымкент қаласы әкімінің орынбасарына шабуыл жасаушы күдіктінің үстінен екі бап бойынша қылмыстық іс қозғалды. Бұл Dalanews.kz ақпарына сүйенген rast.kz хабарлайды.
Шымкент қалалық полиция департаменті қала әкімінің орынбасары Руслан Берденовке қарулы шабуыл жасау дерегі бойынша тергеу жүріп жатқанын, онда Қылмыстық кодекстің екі бабы бойынша қылмыстық іс қозғалғанын жеткізді.
Атап айтқанда:
ҚК-нің 24-бабының 3-бөлігі — қылмысқа оқталу – қасақана қылмыс жасауға тікелей бағытталған әрекеттер (әрекетсiздiк), егер ол адамға байланысты емес мән-жайлар бойынша ақырына дейiн аяқталмаса, қылмысқа оқталу деп танылады.
ҚК-нің 99-бабының 2-бөлігі, 6-тармағы — 2. Осы баптың бірінші бөлігінде көзделген адам өлтіру мынадай: 6) өзге адамдардың өміріне қауіпті тәсілмен жасалса,он бес жылдан жиырма жылға дейінгі мерзімге бас бостандығынан айыруға, немесе өмір бойына бас бостандығынан айыруға жазаланады.
Полиция бұл баптар бойынша 15 жылдан 20 жылға дейін бас бостандығынан айыру немесе мүлкін тәркілей отырып не тәркілемей, өмір бойына бас бостандығынан айыру жазасы қарастырылатынын атап өтті. Бұл — соттың шешіміне байланысты болады.
Еске сала кетейік, Руслан Берденов 21 сәуірде үш рет дробовикпен атылып, ауыр жарақат алған. Шабуыл жасаған күдікті ұсталды. Шымкент әкімінің орынбасары шұғыл түрде ота жасатып, қазіргі таңда ауыр жарақаттан кейін дәрігерлердің бақылауында қалып, емделіп жатыр.
