USD
АСТАНА. 13 маусым. Еліміз өңірлерінде сұранысқа барынша зәру бағыттар бойынша ауруханалар жанынан 23 жаңа бөлімше ашылды. Бұл туралы Денсаулық сақтау министрлігі баспасөз қызметінің дерегіне сүйенген rast.kz хабарлайды.
Қазақстанның барлық аймақтары бойынша облыстық ауруханаларды ауқымды жаңғырту бағдарламасы шеңберінде сұранысқа ие терапиялық бағыттарда 23 жаңа бөлімше қатарға қосылды.
Жаңа бөлімшелер ересектер мен балалардың арасында қажеттілігі жоғары медициналық бағыттар бойынша құрылды. Олар ревматология, пульмонология, гастроэнтерология, эндокринология, гематология, нефрология және кардиология секілді салаларды қамтиды.
Жоба 2024–2030 жылдарға арналған денсаулық сақтау инфрақұрылымын дамыту тұжырымдамасы шеңберінде жүзеге асырылды. Ол тұрғындар үшін мамандандырылған медициналық көмектің қолжетімділігін арттыруға бағытталған.
Жалпы алғанда, мастер-жоспарларға сәйкес еліміздегі 19 облыстық көп бейінді ауруханада, 15 облыстық балалар ауруханасында және 19 перинаталдық орталықта 2700 төсекке арналған 55 жаңа бөлімше ашу көзделген.
Қазіргі таңда олардың ішінде 7 ревматология, 4 пульмонология, 6 гастроэнтерология, 2 гематология, 3 эндокринология, 2 нефрология және 2 кардиология бөлімшелері өз жұмыстарын бастап кетті.
Бұдан бөлек, облыстық балалар ауруханаларында 302 төсекке арналған 22 бөлімше ашу жоспарланған. Осыған сәйкес қазірдің өзінде 168 төсекке арналған 9 бөлімше пайдалануға берілді.
Енді пульмонологиялық, неврологиялық, оториноларингологиялық, оңалту, травматологиялық және паллиативтік көмекті кеңейту көзделіп отыр.
2026 жылдың 1-тоқсанының қорытындысы бойынша еліміздің облыстық және қалалық стационарларында 59 895 пациент ем қабылдады. Сөйтіп, облыстық деңгейдегі стационарларда емделген пациенттер саны өткен жылдың сәйкес кезеңімен салыстырғанда, 1 337 адамға артты.
Денсаулық сақтау министрлігі 2026 жылдың басынан бастап облыстық ауруханаларды жаңғырту бағдарламасын іске асыруда. Бұл бағдарлама денсаулық сақтау жүйесін кешенді жаңғыртудың бір бөлігі болып табылады және еліміздің барлық өңірлерінің тұрғындарына сапалы, қауіпсіз әрі қолжетімді мамандандырылған медициналық көмек көрсететін заманауи медициналық ұйымдар желісін қалыптастыруға бағытталған.
