USD
АЛМАТЫ. 23 сәуір. Ресейдің Саха-Якутия республикасының Қазақстандағы күндері аясында кеше екі жақтың Жазушылар одақтары бірлесіп жұмыс жасасу жөніндегі келісімге қол қойды. Бұл туралы ЯСИА ақпарат агентігінің ақпарына сүйенген rast.kz хабарлайды.
Республикалар Жазушылар одақтарының басшылары саха-қазақ әдеби байланысын нығайта түсу мәселесін талқылаған дөңгелек үстел өткізді. Оған екі жақтан да жазушылар қатысты.
«Біз Саханың Қазақстандағы күндерінің өте жоғары деңгейде ұйымдастырылғанына, осы кезеңде Астанада, сондай-ақ Алматы қаласында көптеген шаралар өткізілгеніне қуаныштымыз. Бүгінгі дөңгелек үстел Саха мен Қазақстанның жазушылар қауымдастықтарын бір мүддеге топтастырды, ол біздердің ертеде басталған әдебиеттегі достық байланысымыздың берік екенін көрсетті», – деп атап өтті делегация басшысы, Саха-Якутия үкіметі басшысының орынбасары Анатолий Асколонович Семенов.
Қазақ және саха жазушыларының өзара әдеби байланысы сонау кеңес заманында, 70-ші жылдардың басында қалыптасқан еді. Сол кезде Қазақстан Жазушылар одағының хатшысы Қалаубек Тұрсынқұлов бастаған қазақ жазушыларының делегациясы сеңнің көбесін сөгіп, саха еліне қарай рухани жол ашты. Сол байланыс Одақ тарағанға дейін жалғасты. Осы жолдағы сіңірген айрықша еңбегі үшін жазушы Қалаубек Тұрсынқұлов кейін Саха Республикасының еңбек сіңірген қайраткері, Саха Республикасының Мемлекеттік сыйлығы мен Эрлик Эристин атындағы әдеби сыйлығының лауреаты атанса, ақын Тұрсынай Оразбаева Саха-Якутия республикасының еңбек сіңірген қайраткері атағын алды.
Саха-Якутия вице-министрі жиында саха халқының ежелгі батырлық эпосы – «Олонхо» дастанын аударған көрнекті қазақ ақыны, Қазақстан Мемлекеттік сыйлығының лауреаты Ұлықбек Есдәулетке республика басшысы Айсен Николаевтың атынан «Халықтар арасындағы бейбітшілік пен достықты нығайтқаны үшін» құрметті белгісін тапсырды. Ал кеше Ұлықбек Есдәулеттің саха тілінде жарыққа шыққан «Таас балбаал ырыата» атты кітабының тұсауы кесілді.
Осы орайда айта кетуіміз керек, Ұлықбек Оразбайұлы Есдәулет Қазақстан Жазушылар одағының басшысы болып тұрған кезінде Қалаубек Тұрсынқұлов бастап беріп кеткен сара жолды жаңғыртып, қазақ-саха әдеби байланысының жалғасуына көп еңбек сіңірді. Ол бауырлас халық ақындары жырларын қазақ тіліне аударып, олардың баспа жүзінен шығарылуына күш салды, қазақ ақындарының онда барып тұруларына жол ашып берді. Ал қазір Саха жазушылар одағы қазақ ақынына өте көлемді «Ньургун Боотур» дастанын түгелдей аударып шығуға ұсыныс беріп отыр.
