USD
НЬЮ-ЙОРК. 14 сәуір. Бала кезінде әйгілі «Үйде жалғыз» фильмінде басты рөлде ойнаған америкалық актёр Маколей Калкин алғаш рет әке атанды. Бұл туралы Esquire журналы өз сайтында хабарлады.
Қазір жасы 40-қа толып отырған актёр мен 33 жастағы актриса Бренда Сонг жұбы осылай бірінші рет балалы болды. Олар қыз балаға Дакота деген есім берді. Сөйтіп, «Үйде жалғыз» («Один дома») фильмі жұлдызының 29 жасында көшенің өткел бөлігінен өтіп бара жатқанында көліктің қағуынан қаза тапқан қарындасының есімін жаңғыртты.
Актёр өз отбасысы үшін қуанышты бұл жағдай жайында көпшілікке өзі айтты.
Калкин мен Сонг бұдан бірнеше жыл бұрын бір-бірімен Таиландта фильмге түсу барысында танысқан еді. Желіде баяндағандай, олар бастапқы кезде жай достарша қарым-қатынас жасасып жүрген. Кейін бұл достық нағыз махаббатқа айналып кеткен. Нәтижесінде екеуі бірге тұра бастаған. Жұрттың айтуына қарағанда, тай қызы Бренда үй тірлігімен шұғылданғанды, соның ішінде қолдан нан пісіргенді жақсы көреді екен. Бұдан бұрын бұл екеуі өзара қарым-қатынаста бір-біріңді түсіне білгенннің маңызды екенін айтқан болатын.
Еске сала кетейік, ертеректе, 1998 жылы Маколей Калкин актриса Рэйчел Майнерге үйленген еді. Алайда, олар 2002 жылы ажырасып кетті. Бұдан кейін актёр Мила Куниспен кездесе бастады. Бірақ журналистер 2011 жылы қаңтарда олардың жолдары екі айрылғанын жазған. Ал Брендамен 2017 жылдың жазында танысса керек.
Маколей Калкин 1980 жылғы 26 тамызда Нью-Йорк қаласында туған. Кино актёрі, телехабар жүргізуші, музыкант. Ол түскен фильмдер арасында «Бак ағай» (1989), «Үйде жалғыз» (1990), «Менің қызым» (1991), «Үйде жалғыз-2: Нью-Йоркте жоғалған» (1992), «Мейірімді ұл» (1993), «Әкесімен бірдей» (1994), «Байшыкеш Ричи» (1994), «Парақтар әміршісі» (1994) картиналары кеңге танылды.
Суретте: «Үйде жалғыз» фильмінен кадр.
