USD
Бүгінде біз медициналық білім беру жүйесін кезең-кезеңімен жаңғыртып келеміз. Бұл реформалардың негізгі ұстанымы – қоғамдағы «Заң және Тәртіп» қағидатына толық сәйкес келеді.
Біздің мақсатымыз – жай ғана өзгеріс енгізу емес. Ең бастысы – дәрігер даярлау жүйесін әділ, ашық және ең алдымен білімге, кәсібилікке әрі пациенттің мүддесіне негізделген жүйеге айналдыру.
Жасыратыны жоқ, ұзақ жылдар бойы медициналық білім беру саласында кейбір мәселелерді тек біліммен ғана емес, таныстықпен немесе түрлі ықпал арқылы шешуге болады деген қоғамдық пікір қалыптасты.
Мұндай көзқарас жүйеге деген сенімді әлсіретті. Ең өкініштісі – жылдар бойы адал оқып, еңбектенген студенттер әділетсіздікке тап болды.
Біз мұндай тәжірибеге түбегейлі тоқтау қоямыз.
Денсаулық сақтау министрлігі үшін басты қағида – баршаға ортақ талап, кәсіби даярлықты әділ бағалау және сыбайлас жемқорлық тәуекелдеріне мүлде төзбеушілік.
Медицинада кездейсоқ адамдарға орын жоқ. Бұл салада білімді, тәжірибені немесе кәсіби біліктілікті ешқандай келісіммен алмастыруға болмайды.
Сондықтан біз медициналық кадрларды даярлау тәсілдерін қайта қарап жатырмыз. Біз үшін ең маңыздысы – дипломның өзі емес, дәрігердің нақты клиникалық шешім қабылдай алуы, өз ісіне жауапкершілікпен қарауы және пациенттің өмірі мен денсаулығына жауап бере алуы.
Бүгінде Қазақстан халықаралық үздік тәжірибелерге негізделген заманауи медициналық білім беру моделін қалыптастырып келеді. Денсаулық сақтау жүйесі дамыған көптеген елдерде білімді әділ бағалау, ашық рәсімдер мен баршаға ортақ талаптар медициналық білімнің берік негізі саналады. Біз де осы бағытпен нық қадам жасап келеміз.
Кез келген реформа сұрақ туындатады және оған бейімделу үшін уақыт қажет. Бірақ өзгермейтін құндылықтар бар. Олар – заң үстемдігі, әділдік, ашықтық және әрбір азаматқа тең мүмкіндік.
Өйткені мықты денсаулық сақтау жүйесі операция бөлмесінде де, емханада да емес, ең алдымен студенттік аудиторияларда және университет клиникаларында қалыптасады.
Ақмарал ӘЛНАЗАРОВА,
Қазақстан Республикасы Денсаулық сақтау министрі
