USD
КИЕВ. 11 шілде. Украина Қарулы күштері құрамында «Ресейге алыс қашықтықтан ықпал етуді» жүзеге асыратын қолбасшылық құрылғаны белгілі болды. Бұл туралы The Moscow Times ақпарына сүйенген rast.kz хабарлайды.
Украина президенті Володимир Зеленський Украина Қарулы күштерінің құрамында арнайы қолбасшылық құрылғанын жариялады, оның міндеті Ресейге алыс қашықтықтан шабуылдау арқылы ықпал ету, басқыншыларды ұдайы бақылауда ұстау, сол арқылы Кремльді келіссөз үстеліне отыруға мәжбүрлеу болып табылады.
«Бүгін мен Қарулы күштер құрамында арнайы қолбасшылық құру туралы жарлыққа қол қойдым – бұл іс жүзінде соғыста Ресейге алыс қашықтықтан кең ауқымда әсер ету әрекеті болып табылады», – деді мемлекет басшысы өзінің дәстүрлі кешкі видеоүндеуінде.
Оның айтуынша, жаңа қолбасшылық Ресейдің әскери әлеуетін айтарлықтай әлсірету үшін қолда бар барлық ресурстарды бір жерге шоғырландыруы тиіс.
Зеленський жаңа құрылым қолбасшысының аты-жөнін атаған жоқ, бірақ бұл адамның «күшті және мүмкіндігінше тәжірибелі болатынын» атап өтті.
Сонымен бір мезгілде Украина президенті Біріккен жедел әрекет ету күштерін құру туралы жарлыққа да қол қойды. Олардың командирі болып бригада генералы, Украинаның қаһарманы, десанттық-штурм әскерлері 8-ші корпусының командирі Дмитрий Волошин тағайындалды.
«Бригада генералы Волошин Украина Қарулы күштерінің осы бағыттағы әлеуетін одан әрі дамытуды қамтамасыз ете алады», – деді Зеленський.
Украинаның алыс қашықтыққа әсер ету қолбасшылығының құрылуы Ресейдің энергетикалық инфрақұрылымына беріліп жатқан сәтті соққылар нәтижесінде пайда болды.
