USD
АСТАНА. 5 мамыр. Қазақстан 2027 жылдан бастап Ресейден электр энергиясын алып тұрудан бас тарту жөнінде шешім қабылдады. Бұл туралы The Moscow Times ақпарына сүйенген rast.kz хабарлайды.
Мұның жайын Энергетика министрінің орынбасары Сұңғат Есімханов тарқатып айтты.
«Егер осы жылдың аяғында, келесі жылдың басында біз барлық жоспарланған [энергетикалық] нысандарды өндіріске қосатын болсақ, онда 2027 жылы біз [Ресейден электр энергиясын сатып алмаймыз] деп ойлаймын», – деді Есімханов.
Ол биылғы жылы республикадағы өндіріс көлемі мен экономиканың қажеттіліктері арасындағы айырмашылық 1-1, 2 млрд кВт/сағ болатынын атап өтті. Шенеунік 2024 жылы электр энергиясының тапшылығы екі есе көп болғанын және 2,1 миллиард кВт/сағ болғанын еске салды, бірақ, айтуына қарағанда, біртіндеп «бұл көрсеткіш азаяды».
Қаңтар айында Қазақстанның Энергетика министрі Еран Ақкенженов елімізде жалпы инвестиция көлемі 13 трлн теңгеден асатын ($25 млрд-тан астам) жалпы қуаты 15,3 ГВт болатын 81 жоба бойынша жұмыс жүргізіліп жатқанын айтты. Бұл жобалардың көпшілігі 2027 жылдың бірінші тоқсанының соңына дейін аяқталуы керек.
Қазақстан Ресейден электр энергиясын көптеп сатып алушылардың қатарына кіреді. 2025 жылы ол жалпы жеткізілім көлемінің шамамен 60%-ды құрады. Сонымен бірге, Ресей үшін ұзақ уақыт бойы негізгі жеткізілім бағыты болған Қытайға экспорт жасау Қиыр Шығыстағы ресейлік қуаттардың тапшылығына байланысты ақырын төмендей бастады, ол 2026 жылдың басында толығымен тоқтады. Бірінші тоқсанның қорытындысы бойынша «Интер РАО» электр энергиясының экспортын жылына 5,8%-ға-2,12 млрд кВт/сағ дейін ұлғайту туралы есеп берді.
Бұған дейін Қазақстан Семей, Көкшетау және Өскеменде ЖЭО салу кезінде ресейлік компаниялардың қызметінен бас тартқан болатын. Көкшетаудағы нысанды ел билігі өз күшімен салуға шешім қабылдады, сондай-ақ «Самұрық-Энерго» компаниясының қатысуымен Қазақстан-Сингапур консорциумы шеңберінде тағы екі жоба қолға алынатын болды. Бұған дейін Ресей құны 2,7 миллиард долларға бағаланған жобаларды жүзеге асыру үшін 15 жыл мерзімге жеңілдетілген қаржыландыруды ұсынады деп болжанған болатын. Алайда қаржыландыруда қиындықтар туындады.
Бұған дейін Қазақстан Екібастұз ГРЭС-2-де үшінші энергия блогын салу сызбасын қайта қарап, ресейлік турбиналар мен генераторлардан бас тартты. Жабдықтың жаңа жеткізушісі қытайлық Harbin Electric International болды. Энергетика министрлігі энергия блогын салу бағасы 650 млрд теңгеден 400 млрд теңгеге дейін төмендегенін, бұл шамамен 5 500 млн үнемдеуге мүмкіндік беретінін атап өтті.
«Сонымен қатар, Қазақстан Ресейдің орнына Қытайға екі атом электр станциясын салуға келісімшарттар берді», деп хабарлады өткен жылы Қазақстанның бірінші вице-премьері Роман Скляр (Қазір Президент әкімшілігінің басшысы). Оның айтуынша, жобалардың техникалық-экономикалық негіздемесі мен жобалау-сметалық құжаттамасы әзірленуде.
