Путинді сынаған Ремесло психиатриялық ауруханаға жатқызылды
САНКТ-ПЕТЕРБУРГ. 19 наурыз Кремльдің көсемі Владимир Путинді сынға алған Z-арна блогері Илья Ремесло кеше түнде психиатриялық ауруханаға апарылды. Бұл туралы Dialog.ua ақпарына сүйенген rast.kz хабарлайды.
Бүгін таң азаннан бері Z-арналар Илья Ремеслоның Путин мен оның режимін сынағаннан кейін Санкт-Петербургтегі психиатриялық ауруханаға, яғни жындыханаға жатқызылғанын жазып жатыр.
Блогердің Telegram арнасы таңертең жазба жариялауды тоқтатқаны атап өтілді. Хабарларға қарағанда, ол бірнеше сағат бойы мессенджерге кірмеген және қоңырауларға жауап бермейді; онымен байланысу әрекеттері «жазылушы қолжетімді емес» деген жауап алады. Ақпаратты оның ресейлік әріптесі Олег Царев та растады.
Соғысты жақтайтын арналардың хабарлауынша, Ремесло қазір совет заманында диссиденттер жатқызылған Скворцов-Степанов ауруханасында ұсталуда. Z-авторларының бірі ақпарат «аурухананың өзінен» келгенін мәлімдеді, ал «Два майора» арнасы хабарламаны «Революция сәтсіз аяқталды» деген жазумен қайта жариялады.
Жазбаларда блогерді қорлайтын пікірлер де бар, бұл әлеуметтік желілердегі талқылауды одан әрі қыздырды.
Ресей тәжірибесінде үкімет сыншыларын психиатриялық мекемелерге орналастыру жаңа құбылыс болып табылады – бұрын кеңестік құпия қызметтер диссиденттерді психиатриялық ауруханаларға орналастырып, оларға мәжбүрлі түрде психотроптық дәрі-дәрмектер беретін.
Айта кетейік, бұрын оппозицияның үстінен Кремльге мәлімет беріп келген Z-инсайдер Илья Ремесло кеше 180 градусқа аунап түсіп, әлеуметтік желіде «Менің Владимир Путинді қолдауымды тоқтатуыма себеп болған бес жағдай» деген жазба жариялады. Онда Кремльдің шпионы өз шефінен неге бас тартып отырғанын бес фактімен тұздықтап жазады. Соның біріншісі Путиннің Украинаға ашқан соғысы тұйыққа тіреліп, елге орасан зор шығын әкелгенімен, қарапайым адамдардың бұл соғыстан зияннан басқа ештеңе көрмейтінімен байланысты болып отыр. Бұдан әрі елде баспасөз бостандығы тұншықтырылғаны, интернет жұмыс істемейтіні, оппозицияның жоқтығы, мұның бәрі билікте 25 жылдан астам уақыт отырған Путиннен екені, ал оның Гаага арқылы сотталуы керектігі айтылады.
Сонан кейін насихатшы Путиннің отбасы туралы да жазба жариялады. Мұның алдында телеграм-арнада осы тақырыпта сұхбат бергені тағы бар.
Әлбетте, Ремеслоның бұл жазбалары мен пікір айтуы Ресейде бірден үлкен жанжал тудырды. Олардың бірінде Z-блогер Путиннің қыздары туралы пікір айтып, бұрынғы гимнастшы Алина Кабаевадан туған кіші балаларын да қозғап өтеді. Осының барысында Ремесло Путиннің өзінің де іс жүзінде қандай адам екенін, оның қорқақтығы мен екіжүзділігін паш етеді.
