Трамп РФ-мен сауда жасасатындарға санкция салатынын тағы айтты
УАШИНГТОН. 17 қараша. АҚШ президенті Дональд Трамп Ресеймен сауда жасасып отырған мемлекеттерге санкция салатынын айтып, тағы айбат шекті. Бұл туралы DW ақпарына сүйенген rast,kz хабарлайды.
«АҚШ Конгресі Ресеймен сауда жасайтын елдерге санкциялар енгізу туралы заң жобасын әзірлеп жатыр», – деді Ақүйдің қожайыны.
АҚШ Республикалық партиясының мүшелері Украинаға толық ауқымды басып кіру кезінде Ресеймен бизнес жүргізуді жалғастыратын кез келген елге санкциялар салатын заң жобасын әзірлеуде. АҚШ президенті Дональд Трамп бұл туралы 16 қараша, жексенбі күні Флоридадағы Air Force One әуе күштері арқылы БАҚ-қа берген сұхбатында мәлімдеді.
Кездесу барысында журналист «АҚШ Конгресі Ресей мен оның президенті Владимир Путинге Украинадағы соғысты тоқтату үшін қысым жасауды жалғастыратын уақыт келді ме?» деп сұрады. «Мен олардың бұл мәселе бойынша жұмыс істеп жатқанын естідім және мен бұған келісемін», – деп жауап берді Трамп сонда. «Республикашылдар өте күшті заң жобасын ұсынып отыр, ол Ресеймен бизнес жасайтын кез келген ел үшін екі жаққа да санкциялар салады», – деді ол сосын.
АҚШ президентінің айтуынша, Иран осындай елдердің тізіміне қосылуы мүмкін. Сәуір айында сенаторлар Линдси Грэм мен Ричард Блюменталь Ресейден мұнай, газ, уран және басқа да тауарларды сатып алатын, бірақ Украинаны Ресейдің басып кіруінен қорғауда қолдамайтын елдерге 500 пайызға дейін сауда тарифтерін енгізуді талап етті.
«Үндістан мен Қытай Путиннің мұнайының 70%-ын сатып алады, бұл оның соғыс машинасын жұмыс істеп тұруға мүмкіндік береді. 84 сенатор бірлесіп ұсынған менің заң жобам президентке Путиннің соғыс машинасын қаржыландыруды тоқтату және оларды келіссөздер үстеліне мәжбүрлеу үшін Үндістанға, Қытайға және басқа елдерге санкциялар енгізуге мүмкіндік береді», – деп түсіндірді Грэм.
