Мерц Путиннің «соғыс қылмыскері» екенін қадап тұрып айтты
БЕРЛИН. 3 қыркүйек. Германия канцлері Фридрих Мерц Ресей диктаторы Владимир Путинді «соғыс қылмыскері» деп атады. Бұл туралы DW ақпарына сүйенген rast.kz хабарлайды.
«Ресей президенті қазір Украинамен бітімге келуге немесе онымен арада бейбітшілік орнатуға боса болмаса ешқандай негіз жоқ екенін білдіріп отыр, алайда мұндай негізді РФ-ға экономикалық қысым көрсету арқылы жасап алудың мүмкіндігі бар», – деп есептейді ГФР үкіметінің басшысы.
Германия канцлері Фридрих Мерц Ресей президенті Владимир Путинді «біздің заманымыздың ең қауіпті соғыс қылмыскері» деп атады. «Ол соғыс қылмыскері», – деді Германия канцлері 2 қыркүйек, сейсенбі күні эфирге шыққан Sat1 телеарнасына берген сұхбатында.
Мерцтің айтуынша, Ресей президенті қазір бітімге келуге немесе одан зоры – бейбітшілік жөнінде келісім жасасуға ешқандай себеп көріп отырған жоқ. «Біз бұған негіз жасауымыз керек. Бұл соғыс тұрғысынан қиын болады, бірақ экономикалық тұрғыдан әбден мүмкін», – деп атап өтті Мерц. Оның айтуынша, мәселе Ресейді өзінің әскери машинасын қолдау мүмкіндігінен айырып, оны экономикалық тұрғыдан «шаршату» болып табылады. Мұны, мысалы, Ресей Федерациясымен саудасын жалғастыратын елдерге баж салығын енгізу арқылы жасауға болады деп есептейді Мерц.
Сонымен бірге Германия канцлері бұған «Путиннің әлдеқандай бір мәлімдемесіне сенуге негіз жоқ» дегенді қосты. Мерц Ресей президентімен келіссөздерде оның алдына түсе берудің қажеті жоқ деген пікірін де білдірді.
Германия канцлері Украина мен Ресей президенттері Володимир Зеленський мен Владимир Путин арасындағы бетпе-бет келіссөздер Швейцарияда өтуі мүмкін деп санайды. Мерц 2 қыркүйекте Швейцария президенті Карин Келлер-Саттермен бірлескен баспасөз мәслихатында: «Женева атысты тоқтату туралы келісімге қол жеткізу үшін қолайлы орын болар еді» деді. Соңғысы Швейцария билігінің мұндай саммитті өткізуге дайын екенін растады.
