Трамп: Украинаға Қырым мен НАТО-дан бас тартуға тура келеді
УАШИНГТОН. 19 тамыз. АҚШ президенті Дональд Трамп Украинаға Путинмен келісімге келу үшін Қырым мен НАТО-дан бас тартуы керек екенін айтты. Бұл туралы DW ақпарына сүйенген rast.kz хабарлайды.
«Бейбітшілік келісімінің бір бөлігі ретінде Украина Қырым мен НАТО мүшелігінен бас тартуы керек», деді Трамп 19 тамыз күні Fox News телеарнасына берген сұхбатында. Ол Путиннің соғыстан шаршағанына күмән келтірмейді, бірақ оның ешқандай келісімге келмей қоюф мүмкін екенін де жоққа шығармады.
АҚШ президенті Дональд Трамп Ресейдің Украинаға қарсы соғысын тоқтататын келісімнің жасалу мүмкіндігі бар екеніне сенеді. Ол мұны Fox News телеарнасындағы Fox & Friends бағдарламасына берген сұхбатында мәлімдеді. Сонымен бірге, Ақ үй басшысы Киевке 2014 жылы Ресей күшпен басып алған Қырымды қайтару үмітінен де, НАТО әскери альянсына кіру ниетінен де бас тартуға тура келетінін атап өтті.
«Бұл екі нұсқаның екеуі де мүмкін емес», – деді ол.
Трамптың айтуынша, ол қашаннан Украинаны Ресей мен Еуропа арасындағы буфер деп санаған. Киев пен оның одақтастары іздеп жүрген кез келген бейбіт келісімнің бөлігі ретінде Украинаның қауіпсіздігіне кепілдік беру туралы сұрақ қойылғанда, Трамп Еуропаның қандай да бір түрде әскер беруге дайын екенін, бірақ басқалай көмек беруді ұйғарып отырған АҚШ-тың мұны жасамайтынын ашып айтты. Америка әскерлерінің Украинада болмайтынына қандай кепілдік бере аласыз деген сұраққа ол: «Мен сізді сендіре аламын. Білесіз бе, мен президентпін ғой» деп жауап берді.
Дональд Трамп уақытты босқа өткізбейтінін және Украинадағы соғысты тоқтатуға бел байлағанын айтты. Ол Ресей президенті Владимир Путин соғысты тоқтатуға келісетініне үміт білдірді, бірақ Ресей басшысы келісім жасағысы келмеуі мүмкін екенін де мойындады. «Шынымды айтсам, бұл жерде артық мәселе болмайды деп ойлаймын. Менің ойымша, Путин соғысудан әбден шаршады. Менің ойымша, олардың бәрі шаршады, бірақ ақыры не боларын кім білсін», – деді Трамп.
Оның пікірінше, Путин мен Зеленськийдің қарым-қатынасы «сәл жақсарған» болуы мүмкін, әйтпесе бұл олардың жеке кездесуін ұйымдастырмас еді. «Біз алдағы екі аптада президент Путиннің не күтетінін білетін боламыз <…> Оның келісім жасағысы келмеуі мүмкін», – деді Трамп. Путиннің содан кейін «қиын жағдайға» тап болуы керек екенін айтты. «Және мен <…> Президент Зеленський өзіне жүктелген нәрсені жасайды деп үміттенемін. Ол да икемді болуы керек», – деп қосты ол.
Трамп еуропалық көшбасшылардың қатысуымен Путинмен сөйлеспегенін айтты. Ол қоңырау кезінде мұны құрметтемеушілік деп санады, өйткені Путин мен Ақ үйдегі кездесуге қатысқан еуропалық көшбасшылар арасында жылы қарым-қатынас болмаған. Осыған қарамастан ол Fox News арнасына берген сұхбатында Путинмен арадағы «өте жақсы қарым-қатынасты» сақтай алғанын айтты.
