USD
АЛМАТЫ. 21 шілде. Алматы қаласының түбіндегі «Бағанашыл» балалар үйі Президенттің араласуымен көшірілмейтін болды. Бұл туралы Dalanews.kz ақпарына сүйенген rast.kz хабарлайды.
Президенттнің Баспасөз хатшысы Руслан Желдібай өзінің telegram-арнасында Алматы қаласының іргесіндегі «Бағанашыл» балалар үйінің тәрбиеленушілері Қонаев қаласына көшірілмейтінін, бұған байланысты Президент Әкімшілігі қызметтік тексеріс жүргізетінін баяндады.
«Бағанашыл» балалар үйінің тәрбиеленушілерін Алматыдан Қонаев қаласына көшіруге байланысты жағдаймен танысқан Қасым-Жомарт Тоқаев Алматы қаласының әкімі Дархан Сатыбалдыға оқушылардың оңтүстік астанада білім алуын жалғастыру үшін балалар үйіне жөндеу жұмыстарын жүргізуді және аталған нысанды қаланың балансына алуды тапсырды.
Мемлекет басшысының тапсырмасына сәйкес, балалар үйі көшірілмейді.
Аталған жағдайға байланысты Президент Әкімшілігі қызметтік тексеріс жүргізеді.
«Ата-анасының қамқорлығынсыз қалған балалардың заң шеңберіндегі барлық құқығы толық сақталады», – деп жазба қалдырды Руслан Желдібай.
Осы күні әлеуметтік желіге балалар үйі тәрбиешілерінің өздерін автобустарға күштеп отырғызбақ болып аласұрып жүрген полицейлерге қарсылық көрсетіп жатқандары түсірілген видео кеңінен тарап кетті.
Мәселеге осыдан кейін Бала құқықтары жөніндегі уәкіл Динара Зәкиева араласты. Ол «Бағанашылдағы» қақтығыс барысында өрескел жағдай тіркеліп, екі баланың зардап шеккенін мәлімдеді.
Зәкиеваның айтуынша, Президенттің тапсырмасына сәйкес, Алматы облыстық балалар үйінде тұрақты тұратын балалар оқуын жалғастыру үшін бұрынғы мекенінде қалатын болды. Ал мекеменің өзі қала қарамағына беріледі.
Алайда көшіру барысы тиісті деңгейде ұйымдастырылмаған.
«Алматы облысының әкімдігі ЦАН-да тұратын балалардың көшуі кезінде қауіпсіздікті қамтамасыз етпеді. Соның салдарынан жол берілмейтін жағдай орын алды: балалар үйінің түлегі қыз есінен танып қалды, бір баланың аяғы жарақаттанды», – деп жазды Зәкиева.
Ол балалардан хабарлама алған соң, соңғы аптада бірнеше рет әкімдікке жүгінгенін айтты.
«Алайда жергілікті атқарушы орган ескерту жасамай, өз бетінше әрекет етті», – деді уәкіл.
Қазіргі таңда Президент Әкімшілігі бұл жағдай бойынша тексеру жүргізіп жатыр.
