Перизат Қайрат сотқа Бауыржан Байбекті шұғыл жеткізуді талап етті
АСТАНА. 14 шілде. Қайырымдылық қорының қаржысын жымқырды деп айыпталған Перизат Қайрат сот процесіне «Нұр Отан» партиясының бұрынғы бас шенеунігі Бауыржан Байбекті келтіруді ұсынды. Бұл туралы Orda.kz ақпарына сүйенген rast.kz хабарлайды.
Ол өзіне тағылған айыпты жоққа шығарды. Айыптау актісі жарияланғаннан кейін ол кінәсін мойындамайтынын мәлімдеді.
«Мен айыптау актісімен келіспеймін. Онда келтірілген дәлелдер негізсіз. Тергеушілердің қиялы үшін жауап бере алмаймын. Алдағы сот отырыстарында бұл айыптауларға жауап беремін», – деді сот залында Перизат Қайрат.
Ол сондай-ақ «Biz Birgemiz Qazaqstan 2030» қоғамдық бірлестігін өз бастамасымен өз бетінше құрмағанын баяндады.
«Айыптау актісінің алғашқы азатжолында менің анаммен бірге қор құрғаным және құжаттарды қолдан жасағаным айтылған. Алайда бұл қор бастапқыда партия бастамасымен, нақтырақ айтқанда, Бауыржан Байбектің жетекшілігімен құрылған. Құрылтайшылар қатарында мен ғана емес, партияның бұрынғы және қазіргі өкілдері де бар», – деді ол.
Сот отырысында Перизат Қайрат Алматы қаласының бұрынғы әкімі Бауыржан Байбекті сотқа шақырып, одан жауап алуды талап етті.
Бұған дейін прокурорлар Арман Кезекен мен Мәдина Оразалина айыптау актісін жария еткен болатын. Онда Перизат Қайрат пен оның анасы Ғайни Алашбаеваның аса ірі көлемде алаяқтық және алдын ала сөз байласу арқылы ақшаны заңдастыру бойынша айыпталып отырғаны атап өтілген.
