USD
КИЕВ. 6 ақпан. Француздың Mirage 2000-5 истребительдерінің алғашқы партиясы Украинаға жеткізілді. Бұл туралы DW ақпарына сүйенген rast.kz хабарлады.
«Украина аспанын күзетуге біздің истребительдер де кіріседі», – деді Франция қорғаныс министрі Себастьен Лекорню. Бірақ жеткізілген ұшақтардың санын атамады.
Франция 2024 жылдың соңына дейін жеткізіп беруге уәде еткен көп мақсатты Mirage 2000-5 истребительдерін енді жіберіп отыр. «Францияда украин пилоттарын бірнеше ай оқытып шығарғаннан кейін ұшақтар бірінші рет Украинаға аттандырылды», – деп жазды бейсенбі, 6 ақпан күні француз қорғаныс министрі Себастьен Лекорню Х әлеуметтік желісінде.
Осы аралықта BFMTV телеарнасы француз әуе қорғанысы күштерінің қарауындағы 26 истребительдің 6-уын украин жеріне жіберуді жоспарлап отырғанын жариялап үлгерді.
Франция президенті Эмманюэль Макрон 2024 жылғы маусымның басында Украинаға жылдың соңына дейін Mirage-2000 истребителінің бір партиясын беруге уәде еткен болатын. Қорғаныс министрі Лекорню қазан айында ұшақтарды жеткізу 2025 жылдың бірінші тоқсанға дейін қалдырылғанын айтты.
Mirage 2000-5 – бұған дейінгі Mirage 2000 соғыс ұшағының жаңғыртылған нұсқасы. Ол жақсартылған радармен қамтамасыз етілген, «әуе-әуе» класты Mica қанатты зымырандарымен жарақтандырыла алады, сондай-ақ Францияның соғыс басталғалы Украинаға қорғану үшін жіберіп отырған әуедегі SCALP-EG қанатты ракеталарын да пайдалана береді.
