Кореяда жолаушылар ұшағы апатқа ұшырап, 178 адам қаза тапты
СЕУЛ. 29 желтоқсан. Бүгін Таиландтан Кореяға келіп қонып жатқан әуе лайнері әуежайда апатқа тап болып, 178 адамның өмірін жұлып кетті. Бұл туралы BBC ақпарына сүйенген rast.kz хабарлайды.
Ұшақ бортында 175 жолаушы мен 6 экипаж мүшесі болған. Алдын ала мәлімет бойынша, апат салдарынан екі адам ғана құтқарылған. Ал 120 адамның қаза тапқаны бірден айтылды. Кейін жоғарыдағы екі жолаушы мен бір экипаж мүшелерінен басқалары түгел опат болғаны анықталды.
Кореяның Yonhap агенттігінің хабарлауынша, Jeju Air ұшағы Бангкоктан ұшып шыққан. Ол Сеулден 288 шақырым жерде, елдің оңтүстік-батысында орналасқан Муан әуежайына қону кезінде ұшу-қону жолағынан шығып кетіп, жанындағы қоршауға барып соғылады.
Корей телеарнасы соқтығысудан кейін бірден тұтанған үлкен өртті көрсететін кадрларды ұсынды. Жалынға оранған ұшақ екі бөлікке бөлініп кеткен.
Өрт сөндірушілер бірден құтқару жұмыстарына кіріседі. Алдымен 28 адам қаза тапты деп хабарланғанымен, бірнеше сағаттан кейін расталған құрбандар саны 62 адамға жетті, кейін ұлттық өрт сөндіру қызметі жолаушылар мен экипаж мүшелерінің барлығы дерлік қаза тапқанын хабарлады. Сонымен бірге, ресми мәлімет бойынша 120 қаза тапқан.
Reuters агенттігінің хабарлауынша, аман қалған екі жолаушы да ұшақтың артында болған. Әзірге олардың жағдайы туралы ақпарат жоқ.
Жолаушылардың барлығы дерлік, яғни 173 адам Оңтүстік Корея азаматтары, тағы екеуі таиландтықтар көрінеді.
Оқиғаның неге бұлай өріс алғаны әлі белгісіз. Алдын ала мәлімет бойынша, ұшақ әуеде құстар тобымен соқтығысып қалып, басқарудан айырылған болуы мүмкін. Yonhap агенттігінің хабарлауынша, шассиді басқару жүйесі осы себепті істен шыққан. Тағы бір нұсқа ретінде ел билігі ауа райы жағдайын айтып отыр.
