Әзербайжан ұшағының Ақтаудағы апатынан 35 адам қаза тапты
АҚТАУ. 25 желтоқсан. Бүгін Ақтау қаласының маңында орын алған Әзербайжан ұшағының апаты 35 адамның өмірлерін жұлып кетті. Бұл туралы Oxy.az ақпарына сүйенген rast.kz хабарлайды.
«Бүгін Қазақстанның Ақтау қаласында Azerbaijan Airlines (AZAL) әуе компаниясының Embraer 190 ұшағы апатқа ұшырады. Бакуден Грозныйға қарай J2-8243 рейсін орындау үшін ұшып шыққан әуе кемесі көп ұзамай құстар шоғырымен қақтығысып қалды. Осы оқиға лайнерді алдағы апатына алып барды.
Аспан тұман болғандықтан лайнер үш рет барып, Грозныйға қона алмаған. Сосын бағытты Ақтауға қарай бұрған. Лайнер Каспий теңізінің үстінен жақсы ұшып өткен. Қалаға жақындағанда әуежайға дейін жете алмасын білген борт командирі Игорь Кшнякин мен пилот Александр Кальянинов өз бетінше қонатын жазық іздеген. Бірінші таңдаған жерлері бір ауылдың үсті болып шыққасын, тағы бір айналып ұшып, теңіз жағасындағы тегістеу алапты таңдаған. Содан кейін апаттың зардабы қатты болмауы үшін бір қанатын жерге қарай бұрып барып қонған. Сол кезде сол қанатынан от шыққан.
Ал апатқа ұшыраған ұшақты сол жерде кездейсоқ көріп қалған жергілікті МРЭК компаниясының қызметкерлері оқиға орнына үш минуттың ішінде жетіп, борттан тірі жатқан 15 адамды шығарып алады.
Осы уақытта ТМД елдері басшыларының бейресми саммитіне қатысу үшін Санкт-Петербургке ұшып бара жатқан Әзербайжан президенті Ильхам Әлиев сапарын кілт тоқтатып, Бакыдағы Гейдар Әлиев атындағы аэропортқа қайтып оралады. Ол келген бойда Үкімет отырысын өткізіп, оқиғаның себебін анықтайтын мемлекеттік комиссия құрды, сондай-ақ қаза тапқандардың отбасыларына көмектесуге тапсырма берді.
Осыдан кейін Әзербайжан шенеуніктері апаттың себебін анықтау үшін Ақтау қаласына ұшып келді.
Әзербайжан порталының хабарлауынша, ұшақтың бортында 67 адам болған. Олардың 37-сі – Әзербайжан, 16-сы – Ресей, 6-уы – Қазақстан және 3-уі Қырғызстан азаматы болыпты. Апаттан кейін 32 адам аман қалған. Ал қалғандары, – ішінде экипаж мүшелері де бар, – түгел қаза тапқан. Олардың 29-ы Ақтау ауруханаларына жеткізілді. Астанадан Денсаулық сақтау министрлігінің командасы келіп жетті. Ресей де дәрі-дәрмек арқалаған лайнер жөнелтті.
Қазір апаттан тірі қалғандардың аты-жөндері белгілі. Бір таңқаларлығы, экипаж мүшелері арасынан стюардессаның бірі Айдан Рагимли ғана аман шығыпты.
