USD
ПАРИЖ. 2 тамыз. Бүгін Олимпиялық ойындардың бокс турнирінде кезекті жеңісіне жеткен Нұрбек Оралбай жартылай финалға жолдама алды. Бұл туралы өз мәнбесіне сүйенген rast.kz хабарлайды.
Біздің 80 келіге дейінгі салмақ дәрежесіндегі боксшымыз Нұрбек Оралбай ширек финалда әзербайжан Мурад Аллахвердиевті 5:0 есебімен ұтты.
Шайқастың бірінші раундында қарсыластар аянып қалған жоқ. Екі боксшы да кездесу тізгінін бірден өз қолдарына ұстауға ұмтылып бақты. Соның сыңайында Нұрбек көбірек сәтті өнер көрсетті. Ол, әсіресе, раунд соңында бірнеше қатты да дәл соққы бере алды. Сірә, осы мезет таразы басын оған қарай аударып жіберсе керек. Төрешілер, сөйтіп, оның пайдасына 4:1 деген есеп жазды.
Бәсекелестер екінші раундта да қарқындарынан қайтқан жоқ. Алаңда позициялық шайқас үздіксіз жүріп жатты. Оның барысында ұдайы шабуылдаушы жақтың дағарасын қаққан біздің бағлан қателескен жоқ. Сондықтан қазылар бұл жолы оған 5:0 деген жеңіс берді.
Үшінші раундта ақыры әзербайжан атлеті бірінші нөмірмен ойнай бастады. Ол ұтылып жатқанын білгесін, бәрінің қарымтасын қайтарып алмаққа ұмтылды. Соның ыңғайында өзі қорғанысты ұмытып, қайта-қайта қарымта соққыларға тап бола берді.
Қорытындыда төрешілер жекпе-жекте Нұрбек Оралбай 5:0 есебімен жеңіске жетті деп бағалады.
Осылайша Нұрбек Қазақстан құрамасы сапынан бірінші болып жартылай финалға шықты.
Бүгін енді 75 келіге дейінгі салмақтағы Карина Ибрагимова мен 51 келіге дейінгі салмақтағы Сәкен Бибосынов шаршы алаңға шығады. Бұлардың біріншісі 1/8 финалдық, ал екіншісі ширек финалдық шайқастарын өткізеді. Соның ішінде Карина Ибрагимова Пуэрто-Рико атлеті Эшли Энн Лозада Моттамен, ал Сәкен Бибосынов өзбек Хасанбой Дусматовпен жұдырық сілтеседі.
