Мас болып, көлік жүргізген Қостанайдың бас имамы қызметінен босатылды
АСТАНА. 25 шілде. Қазақстан мұсылмандары діни басқармасы (ҚМДБ) мас күйінде көлік жүргізіп, 15 күнге қамалған Қостанай облысының бас имамын қызметінен алды. Бұл туралы Aikyn.kz дерегіне сүйенген rast.kz хабарлайды.
«Қазақстан мұсылмандары діни басқармасы мас күйінде көлік жүргізі, қамауға алынған Қостанай облысының бас имамы Бақытбек Тәжімбетке қатысты мәлімдеме жасады», – делінген ресурс хабарламасында.
«Діни басқарманың қызмет жүйесінде заң нормаларын және дін қызметкері этикасын өрескел бұзатын жеке тұлғалардың діни салада жұмыс істеуіне моральдық тұрғыдан құқығы жоқ. ҚМДБ дін қызметкеріне лайықсыз әрекет жасаған Бақытбек Тәжімбетті Қостанай облысының бас имамы қызметінен босатты. Қазақстан мұсылмандары діни басқармасы болған оқиғаны үлкен өкінішпен қабылдап, еліміздегі мұсылман жамағатынан кешірім сұрайды», – деді ҚМДБ баспасөз қызметінен.
Еске сала кетейік, Қостанай облысының бас имамы Бақытбек Тәжімбет 23 шілде күні Ақмола облысының Бурабай кентінде мас күйінде Toyota Highlander автокөлігіне отырып, жол ережесін бұзғаны үшін 15 тәулікке қамалып, 7 жылға жүргізуші куәлігінен айырылды. Бірақ ол сот отырысында өз кінәсін мойындамай, алкогольдік ішімдік емес, қымыз ішкенін айтқан. Дегенмен сот отырысында зерттелген бейнежазба бойынша дәрігер қойған сұраққа «сыра іштім» деп жауап берген.
Айта кетейік, Бақытбек Нұрғабылұлы Тәжімбет 1983 жылы 17 мамырда Қызылорда облысы Жаңақорған ауданында туған. Аудандағы № 125 С. Сапарбеков атындағы қазақ орта мектебінде, Түркістан қаласындағы Хасан Оралтай атындағы медреседе, Шымкент қаласындағы «Қамар» медресесінде, Алматы қаласындағы «Таугүл» медресесінде тәлім алған. 2005-2006 жылдары Ыстамбұл қаласындағы «Ыстамбұл муфтиятында» оқыған.
2015 жылдың қараша айының 12-нен Қостанай облысы бойынша өкіл имам және облыстық «Марал ишан» мешітінің бас имамы болып тағайындалған.
Отбасында екі бала тәрбиелеп, өсіріп отыр.
Тағы бір тоқтала кететін жайт, қостанайлық журналистер бас имамның адам ретінде жақсы тұлға екенін, оның биылғы су тасқыны кезінде зардап шеккендерге көп көмек көрсеткеннін айтып жатыр.
