ХОК IBA-ны мойындалған халықаралық федерациялар тізімінен шығарды
ПАРИЖ. 24 шілде. Халықаралық Олимпиялық комитет (ХОК) кеше Халықаралық бокс ассоциациясын (IBA) өзі мойындайтын федерациялар құрамынан алып тастады. Бұл туралы Forbes ақпарына сүйенген rast.kz хабарлайды.
Француз байтағында алдымен Халықаралық Олимпиялық комитеттің 142-сессиясы болып өтті. Онда ХОК-тың президенті Томас Бах пен ұйымның тағы 14 мүшесі жаңа мерзімге қайта сайланды. Бір айта кететін жайт, Бах 1991 жылдан бері комитеттің мүшесі болып келеді.
Сессияда сондай-ақ комитет мүшелері Халықаралық бокс ассоциациясын (IBA) тануды жою жөніндегі шешімге бір ауыздан дауыс берді. IBA-ны 2020 жылдан бері ресейлік Умар Кремлев басқарады.
Осыған байланысты бүгін Олимпиялық хартияға IBA-ның беделді халықаралдық федерация ретінде мойындалмайтыны жөнінде түзету енгізілді.
ХОК 2023 жылдың жазында-ақ IBA-ны мойындау жөніндегі ұйғарымды кері қайтарып алған болатын. Осыдан кейін ассоциация бұл шешімді «саясиландырылған қадам» деп бағалап, онымен Спорт арбитраж соты (CAS) арқылы дауласуға әрекет жасап көрді. Алайда сот оны қараудан бас тартып, бірден қайтарып тастады.
Мұның бәріне ХОК-тың 2022 жылдың қазан айындағы табанды түрде білдірген ұсынысына қарамастан, IBA-ның Ресей және Беларусь спортшыларын жарыстарға өз елдері туының астында жібергені себеп болды. Осыдан кейін бірқатар елдердің федерациялары наразылық көрсетіп, IBA құрамынан шығып кетті.
ХОК 2019 жылы IBA-ны мойындау мәртебесінен айырған болатын. Себебі, ұйым сол кезде қаржы және басқару салалары бойынша терең дағдарысқа ұшырады. Оған реформа жүргізу талап етілді. Осыған байланысты 2021 жылы Токиода өткен Олимпиаданың бокс турнирін ХОК-тың арнайы комиссиясы жүргізді. Ал 2024 жылғы Париж Олимпиялық ойындарына лицензия беруден бастап, бокс турнирін ұйымдастыру жөніндегі міндетті ХОК өз мойнына алды.
Әлбетте, IBA басшысы Умар Кремлев ХОК-тың кешегі шешіміне бұлқан-талқан болып қарсы шықты. Ол бірден ХОК президенті Томас Бахқа қоқан-лоққы жасауға кірісті.
Еске сала кетейік, 2023 жылы Халықаралық бокс ассоциациясына балама ретінде World Boxing ұйымы құрылды. Басында АҚШ пен Ұлыбритания тұрған оған қазір әлемнің 20-ға жуық елі мүше болып үлгерді.
Қазір ХОК 2028 жылы өтетін Олимпиадаға ІВА-ға мүше елдер бокс құрамасын қатыстырмайтынын ашық мәлімдеп отыр. Енді әрбір елдің бокс федерациясы World Boxing-ке мүше болуы тиіс. Сондықтан таяуда Қазақстан Ұлттық олимпиялық комитетінің президенті Геннадий Головкин Reuters агенттігіне берген сұхбатында еліміздің бокс федерациясына ІВА-дан шығуға ұсыныс білдірген болатын.
Суретте: ХОК президенті Томас Бах
