Қуандық Бишімбаев жазасын Ақмола облысындағы колонияда өтейді
АСТАНА. 20 шілде. Бұрынғы ұлттық экономика министрі Қуандық Бишімбаевтың өз жазасын Ақмола облысындағы қауіпсіздігі жоғары колонияда өтейтіні белгілі болды. Бұл туралы Halyq Uni ақпарына сүйенген rast.kz хабарлайды.
Мұның жайын Орталық коммуникациялар қызметінде өткен брифингте ІІМ қылмыстық-атқару жүйесі комитетінің төрағасы Теңізжан Жәнібеков баяндады.
«Сотталған азамат таяу арада Астанаға жақын Ақмола облысындағы қауіпсіздігі жоғары мекемеге жіберіледі», – деді ол.
Еске сала кетейік, 2023 жылдың 9 қарашасында Астанада өзінің меншігіндегі BAU ресторанында бұрынғы Ұлттық экономика министрі Қуандық Бишімбаев әйелі Салтанат Нүкенованы ұрып өлтірген еді. Сол оқиғадан 2 күн кейін күдікті қамауға алынды. Артынша осы қанды оқиғаны дер кезінде тиісті органдарға хабарламағаны, қайта оны жасыруға тырысқаны үшін күдіктіңің жақын інісі Бақытжан Байжанов та қамалды.
Сот басталған кезде сотталушы Бишімбаев өзіне тағылған айыпты мойындамады. Экс-министрдің айтуынша, Салтанат Нүкенова және оның құрбысы үшеуі «Қазақстан» орталық концерт залына концертке барған. Сол жерде екеуінің арасында жанжал шығып, концерт аяқталмастан шығып кеткен. Артынша BAU мейрамханасына келіп, бірнеше сағат отырған.
13 мамырда Бишімбаев Қылмыстық кодекстің 110-бабы 2-бөлігі 1-тармағы (қинау) бойынша кінәлі деп танылды. Бұл бап бойынша ол 7 жылға бас бостандығынан айырылды. Сотталушы сондай-ақ Қылмыстық кодекстің 99-бабы 2-бөлігі 5-тармағы (аса қатыгездікпен адам өлтіру) бойынша кінәлі деп танылды. Бұл бап бойынша 20 жылға бас бостандығынан айырылды. Соңында Бишімбаевқа түпкілікті 24 жылға бас бостандығынан айыру жазасы тағайындалды.
