USD
АСТАНА. 20 маусым. Қазақстан Республикасы Төтенше жағдайлар министрлігінде биыл штаттық құрылым оңтайландырылып, жаңа департаменттер құрылады. Бұл туралы Ақорда баспасөз қызметіне сілтеме жасаған rast.kz хабарлайды.
Бүгін Мемлекет басшысы Қасым-Жомарт Тоқаевтың қабылдауында болған кезінде Төтенше жағдайлар министрі Шыңғыс Әрінов осының жайын баяндады. Ол Президентке министрлікте өзі келгелі бері атқарылып жатқан жұмыстар мен алдағы жоспарлар жөнінде есеп берді.
Шыңғыс Әрінов министрліктің штаттық құрылымын оңтайландыру, оның материалдық-техникалық құралдармен жабдықталу деңгейін арттыру мәселелері туралы да айтып өтті.
Министр Азаматтық қорғау академиясының құрылысы, әуе авиациясы паркін жаңарту және Каспий теңізінің жағасында Ұлттық теңіз жасағын құру жұмыстары жайында да сөз қозғады. Оның сөзіне қарағанда, қазір елімізде 20 өрт сөндіру депосының құрылысы жүргізіліп жатыр, сондай-ақ елордада тез құрастырылатын өрт сөндіру депосы мен жатақхана салу жөніндегі пилоттық жоба іске қосылған. Бұдан бөлек, министрлік әртүрлі табиғи және техногендік сипаттағы төтенше жағдайлардың алдын алу және жедел әрекет ету шараларын жетілдіру жұмыстарын қолға алған.
Шыңғыс Сайранұлы сонымен қатар Президентке құтқару бөлімшелерін цифрландыру, кадрлық әлеуетті арттыру және азаматтық қорғау органдары қызметкерлерін әлеуметтік тұрғыдан қолдауды күшейту шаралары туралы да мәлімет берді.
Қабылдау соңында Қасым-Жомарт Тоқаев министр Шыңғыс Әріновке азаматтардың қауіпсіздігін қамтамасыз ету және ТЖМ құрылымын жетілдіру жөнінде бірқатар нақты міндеттер жүктеп, тиянақты тапсырмалар берді.
