Маңғыстау облысындағы ауылда мектеп түлектері жаппай төбелес шығарды (видео)

АҚТАУ. 25 мамыр. Маңғыстау облысындағы ауылда мектеп түлектері жаппай төбелеске қатыты. Бұл туралы Lada.kz ақпарына сүйенген rast.kz хабарлайды.

Оқыс оқиға облыстың Бейнеу ауданындағы «Боранқұл» (бұрынғы Опорный) ауылында орын алған.

1948 жылы мұнай барлау жұмыстары нәтижесінде құрылған елді мекенде қазір 7 мыңға таяу адам тұрады. Аудан орталығы – Бейнеуден шамамен 110 шақырымда орналасқан кент теміржолдың бойына, Бейнеу мен Атыраудың тура ортасына орналасқан.

Станциядағы төбелес биыл мектеп бітіріп жатқан оқушылар арасында туындаған. Осы оқиғаның бас жағы түсірілген видео бірден әлеуметтік желіге тарады. Онда төбелеске ондаған баланың қатысып жатқаны көрінеді. Араларында бір-бірлеріне тас атып жүрген жасөспірімдер де бар.

Ауыл «Боранқұл» деген атауды 1999 жылы алған. Бірақ ондағы теміржол станциясы баяғы қалпынша «Опорная» болып аталады.

Шамасы, ауылда екі орта мектеп болуы керек.

Маңғыстау облыстық ішкі істер департаментінің баспасөз қызметі болған жайды растады.

Департамент факт бойынша бұзақылық бабымен 47 оқушының ұсталғанын баяндады.

Қазіргі таңда тергеу амалдары жүріп жатыр.

https://www.instagram.com/reel/C7Y63M-KRfN/?utm_source=ig_embed&ig_rid=7e63e811-a71d-436e-9d4a-ad964b716514