Тағы екі боксшы жігітіміз ширек финалға шықты
ММАН. 7 наурыз. Бүгін Иорданияның астанасы Амман қаласында өтіп жатқан бокстан Океания/Азия құрлықтық бірінші олимпиялық іріктеу турнирінде ерлер құрамасының тағы екі мүшесі ширек финалға қадам басты. Бұл туралы Olimpic.kz сайтына сілтеме жасаған rast.kz хабарлады.
Алдымен 52 килоға дейінгі салмақтағы Сәкен Бибосынов қырғыз Азат Усеналиевпен қолғап түйістірді. Оның қарсыласы өз еліндегі ең күшті боксшылардың бірі еді. Азияның 2013 жылғы чемпионы, 2015 жылғы қола жүлдегері. Бірақ өзі әлемнің соңғы чемпионатының қола жүлдегері болып отырған Сәкен тәжірибелі қарсыласын ұрымтал жерлерінен төпеледі. Ол сол қолымен өте жақсы шабуылдады. Кезектесе жұдырық сілтесу кезінде де басым көрінді. Соңғы раундта сол артықшылығын асыра түсті. Нәтижесінде 5:0 есебімен жеңіске жетті.
57 килоға дейінгі салмақтағы Серік Теміржанов ирактық Жаафар Әл-Суданиді емін-еркін ұтты. Ол қарсыласының соққыларын бойына оншалықты дарытқан жоқ. Ұрыс кезінде прессингке көп барды. Соққыны сериялы түрде жасап отырды. Мұны төрешілер де лайықты бағалап, оған бір ауыздан жеңіс берді.
Бұл күні қыздар командасынан тағы бір спортшымыз жарыс жолынан шығып қалды. Атап айтқанда, 51 килоға дейінгі салмақтағы Ангелина Лукас таиландтық Ютамас Ютпонгпен тең шайқаста есе жіберіп алды.
Еске сала кетейік, осы кезге дейін Зәкір Сафиуллин (63 кг), Абылайхан Жүсіпов (69 кг) Әбілхан Аманқұл (75 кг), Бекзат Нұрдәулетов (81 кг) сынды жігіттеріміз, Валентина Хальзова (69 кг),Надежда Рябец (75 кг), секілді қыздарымыз ширек финалға шыққан болатын. Олардың қатарына бүгін жеңііл салмақтағылар Сәкен Бибосынов пен Серік Теміржанов қосылып отыр.
Жігіттер сапында әзірге шығын жоқ.
Ертең, 8 наурыз күні рингке 91 килодағы Василий Левит пен 91 килодан ауыр салмақтағы Қамшыбек Қоңқабаев шығады. Бұлардың біріншісі осының алдында күшті моңғол боксшысы Ерденебайяр Сандагсуренді сүріндірген тәжік Давлат Болтаевпен шайқасса, екіншісі қытайлық Маймайти Айхимайтимен қолғап түйістіреді.
***
Суретте: Сәкен Бибосынов шайқас үстінде.
Сурет Olimpic.kz сайтынан алынды.
