USD
АСТАНА. 16 сәуір. Әйелін асқан қатыгездікпен ұрып өлтірді деген айып тағылған Қуандық Бишімбаевтың қорғаушысы Мәскеуде жасалған сараптама түйінін іске тігуді ұсынды. Бұл туралы Dalanews.kz ақпарына сүйенген rast.kz хабарлайды.
«Бишімбаевқа қатысты кезекті сот отырысында айыпталушының адвокаттары ресейлік сот-медициналық сарапшыларының Салтанат өліміне байланысты шығарған шешімін оқыды», – делінген хабарламада.
Нақтылай айтқанда, экс-министрдің адвокаттары сотта Мәскеу қаласындағы Н.И. Пирогов атындағы ұлттық зерттеу медициналық университетінің сот-медициналық сарапшылары жасаған қорытынды жайында айтып берді.
Онда ресейлік білгіштер Қазақстанының тұжырымдарына қайшы келетін ой сорабын алға тартады. Айтуларынша, Нүкенова бас миының ауыр жарақаты салдарынан қайтыс болмаған. Бұған Салтанаттың өліміне дейін 3-4 апта бұрын алған ескі гематомадан баста қан кетуі себеп болыпты-мыс.
Сот Бишімбаевтың адвокаттарының өтінішіне сәйкес шешім қабылдау үшін үзіліс жасады.
Тағы бір айта кететін жайт, бүгінгі сот отырысында Қуандық Бишімбаевтың анасы Альмира Нұрлыбекова сөз сөйлеп, бұрынғы келінінің қазасына қатысты мәскеулік сараптама шешімін іс материалдарына қосуды сұрады.
«Мен, әрине, заңгер емеспін. Бірақ егер біздің мәскеулік сараптаманың нәтижесін қабылдамасаңыздар, менің ұлымның конституциялық құқығы бұзылады деп ойлаймын. Сондықтан сот, алқабилер, прокурорлар мен жәбірленуші тараптан мені ана ретінде түсінуді сұраймын. Мұны шын жүрегіммен айтып отырмын», – деді ол.
Еске сала кетейік, бұған дейін алматылық сарапшы Тахир Халимназаров марқұм Нүкенованың өліміне себепкерлік еткен жарақаттарды атап шыққан еді. Ол Салтанаттың қандай соққылар алғанын манекенде көрсетті.
Алматы сот-медицина сараптамасы қызметкерінің айтуынша, жарақаттар мәйітті сараптау нәтижесінде анықталған. Яғни, алғашқы сараптаманы жүргізген сарапшылар жасаған. Олар сарапшы қорытындысында сипатталған.
Халимназаровтың пайымынша, мұның бәрі жалпылама бас жарақаты болып саналады. Оған бетіндегі жарақаттар да, бас сүйегіндегі жарақаттар да жатады.
Сот медицинасында бұл жарақаттардың бәрі сыртқы әсердің кесірінен болған зақымдану ретінде қарастырылады.
Тахир Халимназаров өлімнің себебін айтқан кезде осы жарақаттардың бәрін қарастыру керек екенін айрықша атап өтті. Олардың әрбірін бөлек қарастыруға болмайды.
Сотталушы Бишімбаев сотқа берген жауабында Нүкенованың қабырғаға соғылып, артынша унитазға құлап түскенін баяндаған. Ал сарапшы марқұмның құлау салдарынан ешқандай жарақат алмағанын қадап тұрып айтты.
Сонымен қатар, сот-медициналық сарапшы Салтанат Нүкенованың басындағы субдуральды гематоманың мөлшері 230 грамм болған дегенге тоқталды. Осының өз кез келген адамды өлімге жеткізеді.
Тахир Халимназаровтың айтуынша, Бишімбаев оны қолмен ұрды ма, алақанмен ұрды ма, – маңызды емес. Себебі, бұл жағдайда ұрған адамның салмағы айтарлықтай әсер етеді. Салмағы ірі адам алақанымен болса да ауыр жарақат салуы мүмкін.
