USD
АСТАНА. 21 наурыз. Freedom Holding Corp компаниясының бас директоры Тимур Турлов Грекияны жеңіп шықса, Қазақстан футбол құрамасына 100 млн теңге беретінін айтты. Бұл туралы Stan.kz дерегіне сүйенген rast.kz хабарлайды.
Бүгін түн жарысы ауа Қазақстан құрамасы Афина қаласында Ұлттар лигасының жартылай финалдық плей-офф матчында Грекия құрамасымен күш сынасады.
Кәсіпкердің айтуынша, сыйақы ақшаны ойыншыларға бөліп үлестіру, яғни кімге қанша берілетінін шешу команда капитанының өз еркінде болады.
Ойын Астана уақытымен 00:45-те басталады. Ұтқан команда келесі жартылай финалдық жұп – Грузия – Люксембург арасындағы матчтың жеңімпазымен 26 наурызда финалда кездесіп, Еуропа чемпионатының жолдамасын сарапқа салады.
Құрлық біріншілігі биылғы 14 маусым – 14 шілде аралығында Германияда өтеді.
«Футболдан Еуропа чемпионатына жолдама бұрын-соңды бұлай жақын болған емес. Бұл қазақстандық футбол үшін де, ел үшін де маңызды сәт. Көз алдымызда ұлттық құрама тарих жасауда және қазір оларға қолдау көрсету бұрынғыдан да маңыздырақ. Спортшылар ұзақ жолдан өтті, бірақ алда ЕУРО-2024 іріктеудегі ең маңызды ойын. Жүлде командаға қосымша мотивация береді деп сенемін, сонымен қатар барлығымыздың Қазақстан құрамасы үшін бірге жанкүйер болуымыз да үлкен сый болады деп ойлаймын», – деді бизнесмен өз шешіміне орай түсінік беріп тұрып.
2022 жылы кәсіпкер Тимур Турлов Қазақстан Футбол федерациясы атқару комитетінің құрамына кірді.
Матч бүгін Астана уақытымен 00:35 сағаттан бастап Qazaqstan және Qazsport телеарналарынан тікелей эфирде көрсетіледі.
