USD
Қазақ бақсыларының Алматыда өтетін құрылтайы баннерінің төбесіне «Ұлы даланың соңғы үміті» деп жазылыпты. «Үмітсіз – шайтан» дейді ислами діни сана.
Молдалар зілзала секілді тылсым табиғаттағы апатты адамдардың «азғындауынан» көреді. Сондықтан зілзаланың алдын алудың әрекеті ретінде жұртты жаппай намазға жығылуға, мешітке пітір-садақа беруге, ораза ұстауға, ораза ұстамасаң ақша төлеуге, қажылық жасауға… шақырады. Қысқартып айтсақ, болу яки болмауы екіұшты зілзаланың жауапкершілігін алдын ала адамдардың мойнына іліп қояды. Ислам шарттарын орындамайтындар көбейіп кетсе, Құдай қаһарына мініп зілзала жасап тұрғындарды жазалайды-мыс.
Молдалар Құдайдың қаһарымен қорқытатын бұл насихаттың дәлелі ретінде Құрандағы «Зілзала» сүресін зуылдатып оқиды, басқаларға да «Алла сақтай гөр!» деп осы дұғаны оқыңдар дейді. Ақиқатында, Ақиқат пен Мейірім де Құдайдың басты сипаты, «Зілзала» сүресінің Алматыны жиі тербейтін жер сілкінісіне қатысы жоқ. Құрандағы «Зілзала» сүресі «ақырзамандағы», «қиямет күніндегі» жағдайды түсіндірудің сипаттамасы ғана. Иран және Түркия халқының мұсылманшылдығы алматылықтардан әлденеше күшті. Онда «Құдай неге түріктер мен парсыларға қаһарын төгіп, пәленбай мың мұсылманды жер жастандырған жер сілкінісін жасады?!» деген заңды сұрақ туады.
«Бақсылар Алматы мен Алматы маңында ұйысқан энергетикалық қысымның бетін қайтарады» демеймін. Бірақ бақсылардың ниеті дұрыс сияқты. Бақсылар молдалар секілді зілзала қаупінің жауапкершілігін қарапайым адамдардың мойынына шешілмейтін қамыт қылып ілмейді, мешіт бизнесін қыздыратындай құйтырқы алаяқтық әрекетке бармайды.
Бақсылар трансқа кіріп, Алматыда отырып Көктегі Тәңірімен байланысқа шығып, мегаполис маңына тұйықталған жер асты энергиясын аластап, Тәңіріден сол жамандықты жеті қат Көкке қарай алып кетіп, оның адамзатқа зиянын тигізбейтіндей метеорит секілді майдалап жіберуді жалбарынып сұрайтын шығар. Бақсылар соған сенеді. Сене берсін, олардың бұл ісінен алматылықтарға зиян жоқ қой. Қайта халық зілзала үшін өзін күнәһар сезінбейтін болады, алматылықтардың алабұртқан көңілі жайланып қалады.
Бақсылар «Ұлы даланың соңғы үміті» болса да, алматылықтардан ақша сұрап бәлсініп жатқан жоқ. Тәңірші-бақсылардың молдалардан басты айырмашылығы осы ғой…
Ораз ӘЛІМБЕКОВ
