USD
МӘСКЕУ. 1 наурыз. Ресей саясаттанушысы Валерий Соловей Кремльдің соғыс ашатын тағы екі нысана белгілеп қойғанын жеткізді. Бұл туралы «Диалог. ua» ақпарына сүйенген rast.kz хабарлайды.
Саясаттанушының ойынша, Мәскеу алдағы жазда «Қырым сценариіне» ұқсас жоспарын Балтық елдеріне қарсы қолданады. Нысанада бірінші кезекте Латвия мен Эстония тұр. Ресейді посткеңестік елдер ішіндегі ең қатты жек көретін екі ел бұлар.
«Биылғы 2024 жылдың жазында-ақ Ресей НАТО-ға қарсы агрессиясын бастайды», – дейді Валерий Соловей YouTube желісінде Людмила Немираға берген сұхбатында. Ол Кремльдің Украинадағы соғыстың жайына қарап, НАТО-ны әлсізге санап отырғанын зор сеніммен айтады.
«Солтүстік атлантикалық альянс бұған жеткілікті әскери-экономикалық мүмкіндіктері бар екеніне қарамастан, Украинаның соғыста жеңуіне көмектесе алмайды… Ерік-жігер жоқ, шешімталдық жоқ, Путин осылай деп есептеп отыр, сондықтан НАТО-ға енді азу тісін ақситып көрсететін мезгіл келді», – деді Соловей өз сөзінде.
Ол РФ билігінің қазір НАТО-ға қарсы гибридтік соғыс жүргізуге дайыналып жатқанын атап өтті.
«Қазір Ресейдің алдында екі басты нысана бар, Латвия және Эстония деген. Ойлап көріңіздерші, соғыс басталып кеткеннен кейін оларда төлем жүйесі, банк сайттары жұмыс істемей қалады, мемлекеттік мекемелер құлайды, қозғалыстың тоқтап қалуына байланысты проблемалар қаулап туындайды, жұрт наразы бола бастайды, қылмыс өршіп кетеді (оны дай ұйымдастыра салу да қиын емес), хаос басталады. Мақсат – осы жүгенсіздікті туғызу. Осы жүгенсіздіктер барысында Эстонияда немесе Латвияда тұратын Ресей азаматтарына немесе жалпы орыстарға қатысты әлдеқандай бір жаулық әрекет жасалады. Осыдан кейін Ресей тура 2014 жылы Қырымдағыдай өзінің шектеулі әскери контингентін сол елдерге кіргізәп, бұдан әрі не боларын бақылап отырады», – дейді Соловей.
Оның айтуынша, егер НАТО-ның бұған реакциясы оншалықты қатқыл бола қоймаса, Балтық елдерін жаулап алудың тәуекелі шындыққа айналып шыға келеді.
