USD
АСТАНА. 24 ақпан. Оқу-ағарту министрі Ғани Бейсембаев Білім беру ұйымдары басшылары мен олардың орынбасарларының жалақысы қайта қаралатынын айтты. Бұл туралы Halyq Uni ақпарына сүйенген rast.kz хабарлайды.
Министр бұл мәлімдемені Қызылорда және Жамбыл облыстары мен Шымкент қаласы мектептері директорларымен кездесуі кезінде жасады.
Жиында орта білім берудің өзекті мәселелері мен озық тәжірибені таратуға арналған «Заманауи мектепті басқару: трендтер мен болашақ» тақырыбында семинар ұйымдастырылған. Диалог алаңында басшыларға білім беру сапасын арттыру бағытында мемлекет тарапынан атқарылып жатқан міндеттер мен шаралар туралы айтылды. Атап айтқанда, балалардың қауіпсіздігін қамтамасыз ету, жайлы орта құру, цифрландыру, тиімді тәрбие жұмысын ұйымдастыру, инклюзивті білім беру секілді мәселелер сөз болды.
Кездесу бұдан кейін TEDx форматында жалғасты.
Басқосуда Оқу-ағарту министрі Ғани Бейсембаев отандық білім беру жүйесін дамытудың негізгі бағыттарына тоқталды.
«Педагогтерді кәсіби дамыту жүйесі түбегейлі өзгеріп жатыр. Қазіргі тәжірибелі топ-менеджерлер «Болашақ» бағдарламасы бойынша шетелге тағылымдамадан өтуге жіберілетін болады. Педагогтерді қолдау шаралары жалғасады. Осы жылдан бастап білім беру қызметкерлерін көтермелеу жүйесі, сондай-ақ білім беру ұйымдары басшылары мен олардың орынбасарларының жалақылары қайта қаралатын болады», – деді министр.
Кездесуге 800-ге жуық мектеп, білім бөлімдері мен басқармалар басшылары қатысты.
