USD
АСТАНА. 6 ақпан. Әлемге танымал боксшы Геннадий Головкин Қазақстанның ұлттық олимпиялық комитеттен Тимур Құлыбаевты ығыстырып шығаратын сияқты. Бұл туралы Prosports.kz ақпарына сүйенген rast.kz хабарлайды.
YEDILOV ONLINE телеграм-арнасының мәліметінше, Головкин Қазақстанның Ұлттық олимпиадалық комитетін басқаруы мүмкін.
Мұның алдында Парламент Мәжілісінің депутаты Ермұрат Бапи Қазақстан Ұлттық олимпиялық комитетін сынға алған еді. Ол комитетті 2015 жылы олигарх Тимур Құлыбаев басқаруды қолға алғалы бері Қазақстан спортшыларының Олимпиялық ойындардағы көрсеткіштері тек құлдыраумен келе жатқанын атап өтті. Мәжілісмен сондай-ақ комитеттің Құлыбаевтың туған-туыстары мен құда-жекжаттарына толып кеткеніне назар аударған болатын.
Бұл сын Ұлттық комиттетегілердің шымбайларына шым батып кетсе керек, іле-шала оған жауап қайтарды. Онда комитеттің дербес ұйым екенінен басқа ештеңе айтылмады, нақты сындарға бір ауыз да жауап болмады.
Геннадий Геннадьевич Головкин 1982 жылы 8 сәуірде Қарағанды қаласында туған. Олимпиялық ойындардың күміс жүлдегері (2004), әуесқойлар арасындағы әлем чемпионы (2003).
Геннадий 41 жастағы Головкин рингке кейінгі рет 2022 жылы Лас-Вегаста шығып, Сауль Канело Альварестен жеңілген болатын.
Осыдан кейін GGG орта салмақта WBA, IBF және IBO белбеулерін бос қалдырды.
Кезінде «Менің әкем – мордвин, анам – корей қызы, ал мен – қазақпын» дегенді де айтқан осы Гена еді. Ол кәсіпқойлар рингіне шыққанда қазақтың ұлттық шапанын жамылып жүруді өзінің берік дәстүріне айналдырып алған болатын.
